come to my ktab ktab

COULD U PLEZ CALL

MARWA SALAH AND

ASK HER TO COME TO

MY KATB KTAB . TANX

Sender:

Rooby

+2010......

Sent: 10:49:37 pm

02-08-2007

...................................

THE NO. U HAVE

CALLED SAID "SHE

WILL BE IN SERVICE"

:) :) :)

Recipient:

Rooby

010...............

Sent:

12:36:08 am

03-8-2007

ALF MELEOOOOOOOOOOOOOOOOOON MABROK WE RABNA YETMM LEK BE 7'EAR YA ROOBY INTY WE FADY

بحب كتير سوا

دى شوية حاجات أساسية بحبها فى حياتى مثلاً:

بحب أركب الميكروباص جمب الشباك وفى الكورسي اللى بيبقى 2

بحب أركب المترو وأسند على الباب أو إذا كانت ماما دعيالى وقعدت أقعد على الكورسي اللى بيبقى فيه مساحة انى اسند عليها راسى وابص من الشباك

بحب كل أنواع الجبن جدا جدا جدا وبحب أحطها على أى أكل، ودا سبب مشاكل كتير بينى وبين ماما لأنها شايفة انى لازم أنوع فى أكلى عشان جسمى يستفيد

بحب اللبن جدا جدا

بحب معظم أنواع السمك

بحب الميه جدااااااااااااااااااااااااااااااااااااااااااااااااااااااااااااااااااااااااااااااااا وفعلا هى حياتى

بحب الهوا، وباتخنق لما الشباك بيبقى مقفول، رغم ان دا الحال عندنا فى الشغل

بحب أتفرج أوى على الأدوات المكتبية ومتعة التسوق عندى أيام الدراسة أنى أدخل المكتبة وأشترى أقلام ملونة وستيكرز وكشاكيل، رغم ان خطى وحش

بحب مسجد العلم والايمان أوى وبحس بأنى إنسانى مختلفة لما بادخلة، لأنى بيفكرنى بمشاعرى أول ما بدأت التزم وازاى روحانيات الواحد كانت عالية أوى

بحب مسجد رواس ود. خالد أبو شادى أوى

بحب أسافر البلد أوى

بحب أى فرصة تجيلى أسرح مع نفسي فيها رغم انى باسرح فى لا شئ بس بحب انفصالى التام عن الدنيا والحياة حوليا .. وللاسف عرفت من كام يوم ان السرحان فى لا شئ بيضعف الذاكرة

بحب النوم أوى

بحب أسمع أغانى أو موسيقى جداً أكتر من انى اتفرج على التلفزيون، وكنت زمان باسمع الراديو كتيييير

بحب كل أنواع الفاكهة جدا

بحب العصاير أوى أوى، وأبرزهم عصير القصب

ولا أنسي أنى أحي مشروبى الحبيب "الشاى بلبن، والكاكاو بلبن"

بحب العمل التطوعى وبحس ان الفترة اللى ببعد فيها عنه غير محسوبة من عمرى أو بمعنى أوضح باعتبر نفسي ميتة

بحب النضارة جدا وزمان وانا صغيرة كنت بتمنى ان نظرى يضعف عشان البس نضارة .. وقد كان

بحب أسهر للفجر مع ولاء بنت خالى

بحب الشقق اللى فيها بلكونة

بحب الناس اللى بتعرف ترسم واللى صوتها حلو واللى بتعرف تعزف موسيقى

كنت بحب سور المبنى بتاع علمى بتاع مدرسة ثانوى لأنه كان عريض أوى وكنت باقعد واربع عليه أنا واصحابى

بحب أسمع الناس اللى بتكلمنى فى حاجات جديدة وانا مش عارفاها لأنى بحس كتير انى طفلة أوى

بحب أقعد أقرا الاتوجرافات بتاعتى، وبحب أوى الجوابات الورق أكتر من الايميلات والرسايل

بحب القراية بس مش عارفة ليه كتب قلية اللى باقراها من الجلدة للجلدة، تقريبا لأنى شخصية كسولة لحد ما

بحب لعب الأطفال جدا، ولبسهم

بحب أكتب اسمى كتير

بحب الايس كريم أوى أوى

وأخيراً وليس بآخر بحب اموت النمل الصغير بصباعى بس نملة أو اتنين ، وبحب لما ألاقى تجمع نمل أحط عليهم مية واتفرج هما بيعملوا ايه
:) :) :)

س، سؤال

من يومين محمد السيد اسكندرية، وصديق عشرينات الوفى بعت لى تاج، ومن الواضح انى مش هعرف اتهرب منه لانى ساعتها اعتذرت لأنى كنت مشغولة اوى، وجاء وقت الاجابة الان:

س، سؤال: أنت مين؟

ج، جواب: مروة صلاح السيد محمود عجوة- بس عجوة مش مكتوب فى شهادة الميلاد- بكاليورس اعلام قسم صحافة 2005، بشتغل محررة فى موقع عشرينات ومسؤولة عن المراسلين خارج مصر بالموقع.

ليا 5 أخوات أنا أصغرهم منال ومحمد وعبير ومنار، كل واحد فيهم ليه دور مؤثر فى حياتى، أحيانا باقعد أبكى من كتر بما بأحس اد ايه هما بيحبونى (وانتظروا ليهم بوست لوحده).

س، سؤال: مين أكتر 6 شخصيات بتحبيهم فى حياتك؟

ج، جواب: إذا نحيت أخواتى جانبا لأن ليهم مكانة خاصة يبقى:

- ايمان عبد المنعم .. اتعرفت عليها فى عشرينات.
- رحاب علبد المحسن .. اتعرفت عليها فى اسلام أون لاين، واللى خلانا نقرب من بعض اننا بنروح مع بعض.
- أسماء دياب .. صديقة الكلية وبتشتغل دوقتى فى اذاعة اسلام اون لاين.
- خالتو ايمان .. دى كانت مسؤولتى فى فترة من الفترات.
- طعيمة منصور .. زوج عبير أختى، ربنا يزود المحبة بينهم ويبارك لهم فى أولادهم.
- سارة جمال .. كانت صاحبتى فى الكلية وحاليا من أعز صديقاتى.

بس أنا متضايقة انك حددت لى 6 لأنى بحب ناس كتير أوى، ممكن أمر علي أهمهم مرور الكرام بعد اذنك
نهال ودينا وسماح وأمانى وأسماء وخالتو صفاء وولاء بنت خالى ومريم فتوح ومنى سليم.

س، سؤال: أنت سعيدة؟

ج، جواب: مشكلتى ان سعادتى بتتحكم فيها حاجات معينة، ولو الحاجات دى متحققتش بابقى متعكننة.
ان مفيش حد من اخواتى أو أصحابى يبقى متضايق من حاجة أو عنده مشكلة.
انى مبقاش حاسة بان فى حد متضايق منى أو مش بيحبنى أيا كان، بس للأسف لما الواحد احتك اكتشف ان ناس كتير مش بتقدر ان دا احترام لمشاعرها وبتعتبره سذاجة، فبقى الواحد بيضطر انه يبقى أكثر رخامة أو شدة.

بس بابقى فى منتهى سعادتى لو :
عملت حاجة حلوة أوى فى شغلى، أيا كان صغرها ان شاء الله أكون جيبت فكرة مبتكرة.
لو حد من أخواتى أو أصحابى حصلتلو حاجة تفرح.
لو خرجت مع حد منهم.
لو اشتركت فى عمل تطوعى، أيا كان دورى.
لما باشوف ولاد اخواتى.

وحاجات تانية كتيير مش فاكراها دوقتى، بس عموما لما بابقى زعلانة بافتكر كلمة رحاب ان أقول "الحمد لله" لأن ربنا سبحانه وتعالى بيقول "لئن شكرتم لأزيدنكم"، وبافتكر دايما ان فى ناس قريبين منى حصلهم حاجات فعلا يتقال عليها مصائب.

بس أنا عندى استعداد فطرى انى أفرح، منها يوم ما واحدة صاحبتى جابت لى فانوس رمضان كنت هطير من الفرح.

س، سؤال: لو اتجمعت إنت وحسني مبارك في أوضة واحدة حتقوله إيه ؟

ج، جواب: هو ليه الأذى ده

بس فعلا الأخ الفقيد دا غبى جدا جدا جدا لأبعد حد، وعشان يعالج المشكلة ده هانصحه بأنه يختار حد يقرب منه فيه المواصفات دى: نضيف ودبلوماسي وذكى جدا، بس طبعا الأسلوب هيكون محترم عن كدا كتير لأن ديننا بيأمرنا بأن ننزل الناس منازلهم، وفى الآخر هو من سن جدتى الله يرحمها.

بس فعلا السلطة بتفتن جدا، ربنا يكون فى عونه.

س، سؤال: بتحبى مصر؟

ج، جواب: جدا جدا جدا، بس جالى احساس غريب يوم الجمعة اللى فاتت حست اى باكره البلد دى أوى وأنى لازم أسافر منها بأى شكل من الأشكال لأننا داخلين فعلا على أيام سودة على رأى محمد صبحى.

لكن بعد كدا رجعت وقولت ايه دا يا مروة معقولة دى شخصيتك المواقف اصعبة هى اللى بتكشف الناس، لازم تسعى فعلا ان يبقى ليك دور مؤثر فى المجتمع انتى داخلة على 23 سنة ولسه لحد دوقتى معملتيش حاجة تقدرى تقولى عليها فعلا تنفع مجتمعك، بس لو عاوزة تغير من مجتمعك لازم تشتغلى كويس أوى وتفكرى كتير أوى وتقرأى أكتر وتتكلمى مع ناس فعلا حابين يغيروا من حال البلد.

س، سؤال: بتحبى البنات؟ وليه؟

ج، جواب: بفكر أعتذر أنى أجاوب عليهم، بس ع العموم الاتنين عندى سيان ونفسى لما أخلف ربنا يرزقنى ببنات مع ولاد، زى اخواتى ما يبقاش عندي جنس والتانى لأه.

س، سؤال: ايه أكتر موقف محرج اتعرضتى ليه؟

ج، جواب: كتير جدا جدا لأنى شخصية حساسة أوى وباتحرج من أى حاجة.

س، سؤال: ايه الأمنية اللى بتدعى ربنا انه يحققها لك؟

ج، جواب:
- انه يبقى ليا دور فى المجتمع، ويكون العمل ده خالص لوجه الكريم.
- انه يرزقنى قوة عمر ويقين أبى بكر وحياء عثمان.
- انه يهدينى لما يحبه ويرضاه ويرضينى به.
- انه يتوفانى انا واخواتى وولادهم وأزواجهم وهو راضى عنا.
- انه يغفر لوالدى ويرحمهما كما ربيانى صغيرا.
- انه يكرم صاحباتى اوى اوى ويجمعنى بيهم فى الجنة.


جزاكم الله خيرا يا محمد على الأسئلة الظريفة وربنا يكرمك ويحقق لك ما تتمناه، وابقى قولى النتيجة هتظهر فى الكونترول امتى؟ وممكن ادفع للعامل كام عشان يجبهالى؟

رحمك الله كما ربيتنى

أبى الحبيب

هل مرت 7 سنوات على بعدنا أبى الحبيب، أصدقك القول أنى لم أشعر بهن مطلقا لا لأنى لم أشعر حتى الان بوفاتك ومازال بداخلى اقتناع غير عادى أنك مسافر وستعود بعد فترة، ويمكن لأنى لا أحرم نفسي من رؤيتك فحينما يشتد شوقى اليك أدعو الله أن أراك فى أحلامى وكثيرا ما يستحاب الدعاء.

أبى الحبيب لم يكن دعائى أنا وعبير فجر الحادى والعشرين من شهر مايو أن يرحمك الله وأن يصبرنا على ما يختاره لك قسوة قلب منا ولكن لشدة ما وصلت اليه حالتك الصحية من سوء، كغيوبة دائما مختلطة بالقليل من الالام.

لناخذ بعدها قسط بسيط من الراحة ونستيقظ على صوت هادئ لامى ... أبوكم مات ... الثامنة والنصف صباحا.

نهب الى تجهيز كل شيئ حتى تلحق بصلاة الجمعة فى البلد، وتتوزع الادوار محمد وعمو حسين (جارنا)يروحوا يجيبوا الكفن، عبير تتصل بالعائلة لاخبارهم، انا ومنار ومنال نقوم بتجهيزك أنت...

رغم قضاء 15 عاما من عمرى مع حضرتك، الا أن صورتك التى ظلت متركزة فى ذهنى عنك حتى الان والتى احلم بها وجهك الجميل يوم وفاتك.......

أبى الحبيب كيف كان شعورك وأنت فى انتظار حفيدك الثامن اليومين القادمين .. وكل الأحداث التى مررنا بها على مدى السبع سنوات الماضية .. كنت ستسر بأغلبها على ما أعتقد

ديسمبر 1998 .. يوم ميلادك كنا نفكر ماذا ستفعل بعد حصولك على المعاش بعد عامين؟

ولكن يشاء القدر أن تتغير كل الترتيبات.

أبى الحبيب لم أنس كلماتك لى التى طالما كنت توصينى بها "الحمد لله على كل شئ"، ولا وصيتك لى بأن أكون مرنة فى تعاملاتى، ولا برك لامك والذى لم أرى مثله وأشهد الله على ذلك، ولا اخلاصك فى علاقاتك الاجتماعية التى كنت بارعا فى صنعها واستمرارها، ولا اصطحابك لى للمسجد لاحفظ قران...

وأيضا أنس الانهيار الذى حدث لاسرتنا بعد ما توفاك الله والذى ظل ما يقرب من عام، ولم نخرج منه إلا برحمة من الله.


جزاك الله عنا خيرا فى كل ما ربيتنا عليه وتجاوز عن سيئاتك وجعلنا فى ميزان حسناتك

ابنتك

مروة

النملة قالت للفيل

النملة قالت للفيل:

قُم دلكني..ومقابل ذلك ضحكني

وإذا لم أضحك عوضني

بالتقبيل وبالتمويل

وإذا لم أقنع ..

قدم ليكُل صباح ألف قتيل !

ضحك الفيل فشاطت غضباً

:تسخر مني يا برميل

ما لمضحك فيما قد قيل؟

غيري أصغر ..لكن طلبت أكثر مني

غيرك أكبر ...لكن لبّى وهو ذليل

أي دليل؟

أكبر منك بلاد العرب

وأصغر مني إسرائيل ...

ــــــــــــــــــــــــــــــــــــــــــــــــ

* القصيدة للكاتب احمد مطر، واعتذر عن عدم ذكر اسم الكاتب فور نشرها

فى رحــــــ"ــالإيمانــ"ـــــاب

فرحت جدا طبعا لما ايمان حكيت لى اول اول امبارح على النقاش بينها وبين رحاب انا بحب مين فيهم اكتر وان كل واحدة فيهم كانت بتقول للتانية مروة بتحبك اكتر منى...

أنا فعلا مش عارفة بحب مين اكتر لانى بحبكم انتو الاتنين اوى ... من كام يوم ونفس اليوم اتكرر فى رمضان قلقت من النوم وافتكرتكم انتو الاتنين اوى لدرجة ان عنيا دمعت .. كنت مستغربة اوى ... حب ربنا ليا لدرجة انه ينعم عليا بيكم انتو الاتنين ..

ممكن يكون اميز حاجة فى صداقتنا انها عالية اوى وفيها اخلاص جامد اوى رغم اننا بنشد على بعض فى تعاملتنا احيانا كتيرة لما واحدة فينا بتغلط.

ممكن احب مين اكتر؟

رحاب اللى بتفرحنى جدا فى ردها عليا فى التليفون بعد ما بقول سلامو عليكم (مروةانابحبكاوى..انت غاليةعندىاوى) أو الكلمة اللى دايما بتقولهالى انتى احسن "حد"عرفته فى حياتى، وتليفونات منتصف ليل القاهرة

ايمان ومشينا مع بعض من البحوث للتحرير وحكايتنا

يا الهى انت اعلم ما بقلبى نحوها

انت اعلم انت قلبى دام ينطق حبها

لست ادرى كيف كان قلبى ينبض قبلها

حينما ادعوك ربى استمع لدعائها

حينما انظر لقمرك استشف وجهها

احببتنى فيك ربى وشعرت بحبها

اخبرتنى ان حبى هو مجرى دمها

تلك اختى فيك ربى لا تلتنا نفترق

كيف اشكو من فراق كيف والوعد اتثق

اننا نبقى سويا طالما بقى الرمق

اننا نخلد فى النعيم ان كلانا قد صدق

كدت اغرق فى حياتى كدت افقد الطرق

انقذتنى من ظلامى انقذتنى من الغرق

يا الهى هى نعمة لا تدعها تنجلى

هى ضوئى وسنائى لا تدعها تنطفى

هب لها منك ايمانا تهدى به وتهتدى

وامنحها اللهم علما من عقلها لا ينمحى

واجعل العرش لقانا والذنوب تنجلى

فعلا ثلاثا من كن فيه وجد بهن حلاوة الايمان

وأن يحب المرء لا يحبه الا لله

واقدر لى الخير حيث كان

اللهم اقدر لى الخير حيث كان وارضنى به .. علمتهولى خالتو ايمان ايام ما كنت فى ثانوى كانت دايما توصينى ادعيلها بيه، بس بالمقطع الاول فزودت عليه المقطع التانى (وارضنى به) وبقيت ادعى بيه على طوووول، مع احترامى لصلاة الاستخارة واهميتها بس كنت دايما بحس ان الدعاء ده تاثيره اقوى فى اختياراتى سواء اختيار كلية او اى اختيار تانى فى حياتى بالذات الاختيارات الصعبة ومش واضحة اوى ومحتاج فيها سرعة فى الرد.

لاقيت ان الدعاء ده فعلا محتاجاه فى كل حياتى ان ربنا يقدر لى فيها الخير حيث كان والاهم من كدا انه يرضينى بيه فتحس بعد اختيار ربنا بنشوة وسعادة داخلية اوى.

العفو العام

ينبغي للإنسان أن يصدر كل ليلة عفواً عاماً قبل النوم عن كل من أساء إليه طيلة النهار بكلمة أو مقالة أو غيبة أو شتم أو أي نوع من أنواع الأذى، وبهذه الطريقة سوف يكسب الإنسان الأمن الداخلي والاستقرار النفسي والعفو من الرحمن الرحيم، وطريقة العفو العام عن كل مسيء هي أفضل دواء في العالم يصرف من صيدلة الوحي «ادفع بالتي هي أحسن» «والكاظمين الغيظ والعافين عن الناس والله يحب المحسنين»، يا من أراد الحياة في أبهج صورها وأبهى حُللِها اغسل قلبك سبع مرات بالعفو وعفّره الثامنة الغفران، قام رجل يسبُّ أبا بكر الصديق ويقول: والله لأسبنَّك سباً يدخل معك قبرك، فقال أبو بكر: بل يدخل معك قبرك أنت، وسبَّ رجلٌ الإمام الشعبي فقال الشعبي: إن كنتَ كاذباً فغفر الله لك، وإن كنتَ صادقاً فغفر الله لي.

إن تحويل القلب إلى حيّات للضغينة وعقارب للحقد وأفاعي للحسد أعظم دليل على ضعف الإيمان وضحالة المروءة وسوء التقدير للأمور، وكما يقول شكسبير: لا توقد في صدرك فرناً لعدوك فتحترق فيه أنت، ما أطيب القلب الأبيض الزلال، ما أسعد صاحبه، ما أهنأ عيشه، ما ألّذ نومه، ما أطهر ضميره، ثم هل في هذا العمر القصير مساحة لتصفية الحسابات مع الخصوم، وتسديد فواتير العداوة مع المخالفين؟ إن العمر أقصر من ذلك، وإن الذي يذهب ليقتصّ من كل من أساء إليه وينتقم من كل من أخطأ عليه سوف يعود بذهاب الأجر، وعظيم الوزر، وضيق الصدر، وكثرة الهم مع قرحة المعدة، وارتفاع الضغط، وقد يؤدي ذلك إلى جلطة مفاجئة أو نزيف في الدماغ ينقل صاحبه مباشرة إلى العناية المركّزة ليضاف لقتلانا ممن مات في قسم الباطنية صريعاً للتخمة بعد أكلة شعبية قاتلة، إن أفضل أطباء العالم هم ثلاثة: الدكتور بهجة، وتخصصه السرور والفرح والعفو والصفح، والدكتور هادئ، وتخصصه أخذ الأمور بهدوء والدفع بالتي هي أحسن، والدكتور رجيم، وتخصصه عمل رجيم للجسم لمنعه من كل ضار ومن الإكثار من المشتهيات التي يدعو إليها الشيطان الرجيم.

أيها الناس: الحياة جميلة، ألا ترون النهار بوجهه المشرق وشمسه الساطعة وصباحه البهيج وأصيله الفاتن وغروبه الساحر، لماذا لا تشارك الكون بهجته فتضحك كما تضحك النجوم، وتتفاءل كما تتفاءل الطيور، وتترفق كما يترفق النسيم، وتتلطف كما يتلطف الطّل، الحياة جميلة إذا أخرجتم منها الشيطان والشر والشك والشتم والشؤم والشماتة وشارون، والمشكلة أن بعضنا متشائم تريه وجه الشمس فيشكو حرّها، وتخرج له الزهرة فيريك شوكها، وتشير إلى نجوم الليل فيمتعض من ظلمته، إذاً اقترح عليك أن تصدر الليلة مرسوماً بالعفو عن كل من أساء إليك وبعدها سوف تنام ليلة سعيدة لم يمر بك ليلة أجمل منها كما قال صديقي الشريف الرضي:
* يا لَيلَةَ العفو أَلاّ عُدتِ ثانِيَةً؟ - سَقى زَمانَكَ هَطّالٌ مِنَ الدِيَمِ
هنيئاً للعافين عن الناس، قبلات على رؤوس الكاظمين الغيظ، باقات ورد لمن سامح وأصلح، مع الشكر الجزيل للمقنع الكندي حيث يقول:
* وَلا أَحمِلُ الحِقدَ القَديمَ عَلَيهِمُ - وَلَيسَ كَريمُ القَومِ مَن يَحمِلُ الحِقدا الإنسان السوي والمؤمن الراشد يكون منزوع الدسم من السم عنده براءة اختراع لمكارم الأخلاق، مختومٌ على جبينه خاتم «ومن عفا وأصلح فأجره على الله»، غفر الله لنا إساءتنا للغير، وغفر الله لمن أساء إلينا وغداً نلتقي في الجنة إن شاء الله تحت مظلة «ونزعنا ما في صدورهم من غل إخوانا على سرر متقابلين».

ــــــــــــــــــــــــــــــــــــــ

د. عائض القرنى، الشرق الأوسط : الخميس / 29 / 3 / 2007م

عشــــــــــــرينات والرعيل الأول

النهارده عيد عشرينات المجيد .. كل سنة وأنت طيب يا عشرينات وعقبال 300 سنة وأنت من أحسن لأحسن .

أول واحدة اقترحت عليا أروح عشرينات كانت سارة جمال واحنا فى تالتة كلية عشان أتدرب هناك لما كنت رايحة أتدرب فى اسلام أون لاين، المهم روحت انا وحنان سليمان وقابلنا ساعتها شرين اللى كانت مسؤولة القسم الدينى فى الموقع، اقترحت موضوع عن الاستعداد لرمضان (مرحب شهر الصوم .. من دوقتى) نزل بنفس المقطع الأول بس شرين زودت من دوقتى، حسيت براحة نفسية جدا هناك.

للتصل بنا شرين بعد ذلك عشان نحضر اجتماع مع ا. هشام، كان اجتماع تعريفى بين الناس اللى بيتدربو والخمس الكبار وا. هشام، لتكتشف أن كتاب عشرينات كلهم متدربيــــــــــــــــــــــــن.

وأنت شبشب

كانت فكرة تانى موضوع عن الهدايا يعنى مع ياسمين مسؤولة قسم المنوعات والعلاقات، كان عنوانه (كل هدية وأنت مبسوط بيها)، عشان أعمل موضوع تالت لصفحة الدين وتنتهى علاقتى بالموقع هذا العام لانشغالى فى مشروع التخرج، روحت خلال السنة دى مرة واحدة عشان اسلم على شرين لانى كنت حبيتها اوى وكانت ساعتها لسه راجعة من المغرب.

وأرجع مرة تانية بعد التخرج عشان أراسل عشرينات بعد التخرج، وبعد كدا يطلب منى أنى انتظم، لأتعرف

على البراء اللى بعتنى لعبد الجليل الشرنوبى عشان اتدرب معاه، وكان بيكلمنى على واحدة اسمها ايمان عبدالمنعم، حسيت من كلامه ازاى أبقى فى مجال الصحافة وما أعرفهاش، وبدأت أقرب من هبة اللى وصيتها شرين بعد كدا انها تتبنانى زى ما شرين كانت متبنياها.

عشان أعمل موضوع لصفحة اى جى فوت عن كمال الشاذلى ويحرره براء، ويقترح على أ. احمد نصر أحضر اجتماعات إى جى فوت، وبعدين ندخل فى صفحة رمضان.

نشرة 9 .. أحبك أحبك أحبك

أكتر حاجة بحبها فى عشرينات نشرة 9 لحد دوقتى، اللى كانت مسكاها ياسو وبعدين بقيت انا تحت ايديها فى الموضوع لحد ما سلمتهالى فى نص مارس.

فى يوم كنت جاية فيه الساعة 4 وطلعت قعدت على جهاز فى الثقافى وبعدين لاقيتها بتسالنى ع الماسينجر انتى فين؟؟؟؟، من النهارده انتى مسؤولة عن النشرة .. اتثبت ساعتها .. يعنى ياربى فى اليوم اللى جاية فيه متأخر .. المهم نزلت جرى عشان تقولى على الخبر اليقين .. وشرين تقول لمصعب يعلمنى ازاى ادخل على الادمين وارفع الصور والنص .. وكنت ساعتها باغلط كتير وكان دايما الموضوع يترفع من غير صورة أو يترفع صورة واحدة فى موضوعين .

كانت أجمل فترة ليا فى الموقع بالذات ان كان نفسي اشتغل مع ياسمين، وكانوا بيقولوا ساعتها ان النشرة متميزة جدا، المهم فضلت كدا لحد شهر سبعة بالتحديد 11 يوليو، عشان اخد اجازة اربع وخميس وجمعة وسبت وارجع الاحد، وتانى يوم الاجازة يأسر حزب الله الجنديين الاسرائيليين وتقوم الحرب يوم الخميس عرفت ساعتها انى عاملة توازن فى الوطن العربى!!

المهم بعدها بقيت أنا ومنى مسؤولين عن صفحة الحرب الآن اللى كانت نقلة حلوة اوى فى حياتى وفعلا حبيتها اوى يمكن لأننا الحمد لله قدرنا نعمل فريق عمل لذيذ أوى بمساعدة الاخوان مصعب والمعتصم اللى وعدناهم نجيبلهم تورتة بعد ما تخلص الصفحة وبعد ما يخلص السى دى ولسه موفناش بالوعد.

لأتولى مسؤولية المراسلين وفى رمضان جت لنا فرصة حلوة اوى، دكتور احمد عبدالله هيعمل ندوة فى الساقية عن لبنان، اقترحت منى نستعيد فكرة السى دى اللى كان اقترحها علينا ا. احمد نصر ومكملنهاش، عشان نخلص الموضوع كله فى اقل من أسبوع ،وتتنسخ السي ديهات ونروح نوزعها فى الساقية وبعد كدا نبعتها لبنان مع أروى.

حكاية جهاز

أبرز ذكرياتى فى عشرينات كانت البحث عن جهاز، أول ما شرين قالت لى انتظم قالت هتيجى تقعدى فى الاجتماعى بعد الساعة 4قعدت ايامها فى الاجتماعى والعلمى والشرعى والثقافى والمالتى ميديا والارشيف والجودة، وبعد ما مسكت النشرة نسقت شرين مع ا. على اقعد على جهازه من الصبح لحد الساعة 3 وبعدها اشوف حالى، المهم فضلت كدا لحد ما اتنقلنا ايران وطبعا كانت الكارثة لان اتطلب منا اننا نجى كلنا بدرى .. يعنى انا هقعد فين راحت شرين وا. احمد زين نسقوا مع ا. هانى محمود ربنا يكرمه يجيب اللاب توب بتاعه واقعد عليه، لحد ما الاى تى جاب لأستاذ على جهاز لان جهازه يصلح للاستخدام الادمى بنسبة ضئيلة، وانا خدت الجهاز.. هو صحيح مبقاش يطلع صوت ومبيدخلش ع النت ورك ومؤخرا بقى يعمل ريستارت لوحده والورد كل شوية يقفل لوحده ويطير لى الحاجات اللى كتباها لو مكنتش مسيفه.

عودة للرعيل الأول اللى أحب أقولهم فى عيد ميلاد عشرينات ربنا يكرمكم فعلا اتعلمت من كل واحد فيكم كتير رغم انى مش بختلط كتير معاكم لانى مبعرفش اخد وادى اوى مع الناس، بس فى حاجات كتير اوى اتعلمتها بالملاحظة، شرين انتى طيبة اوى وماشاء الله عليك انك بتعرفى تقربى من كل الناس، ياسو بحب فيك رجاحة عقلك واتزانك، أ. احمد نصر مفتقدة تحميسك ليا اول ما كنت ادخل اسلم على حضرتك تروح قيل لى مروة فى كذا كذا حصل ما تشوفيلنا ظروف الموضوع ده كنت احط الشنطة واقعد اتصل بفلان وفلان عشان اظبط الموضوع، ومش هنسي نصيحة حضرتك بان مش كل اللى بقراه لازم يظهر فى الموضوع لان دا بيبان فى اسلوب الكتابة، ا. على بحاول اتعلم منك ازاى الواحد يجيب لقطة مميزة وهى دى اللى يشتغل عليها دا بجانب اسلوب الكتابة طبعا، ا. احمد زين للاسف ما عرفتش استفيد من حضرتك كتير لأنى قلما كان بيتعدى كلامى مع حضرتك السلام اليومى بس كنت بحاول اركز مع حضرتك فى الاجتماعات واسلوب ادارتك وملاحظاتك، ومن الحاجات اللى بحاسب نفسي انى اتسرعت فيها اليوم اللى دخلت فيه لحضرتك عشان اخد ملاحظاتك على شغلى وللاسف لاقيت حضرتك بتقولى كنت لسه هبعت لك ميل حالا، ومازلت نفسي حضرتك تبعت لى الميل، هبة ما نشيتش انى اركز فى انى احط مدخل لكل فقرة فى الموضوع، مريم بحاول افتكر صورتك وانتى بتشتغلى فى الدوشة واطبق الموضوع ده، البراء افكارك وافتكساتك بالذات يوم اقترحات ملف الغباء، مصعب من كتر الحاجات التقنية اللى اتعلمتها منك ما اقدرش اذكر حاجة معينة بس ليا ملاحظة عليك ان من الصعب ان يكون فى انسان لا اختلاف عليه فى وسط الناس، معتصم صاحب أجمد ايفهات بالذات انك بتقولها وانت بتتكلم جد.

باتمنى لكم كل خير وربنا يكرمكم انتو والفريق الموجود حاليا.

اليوم التالى له 2

12 مارس يوم عقد اسماء ومصطفى

سمسم صتشيقة (صديقة) الجامعة وبتشتغل دوقتى فى الاذاعة مع اسلام اون لاين، ربنا يبارك لها يارب ويتمم لها بخير.

ابرز حاجة فى صحوبيتنا ايام الجامعة ايام الامتحانات، كانت قصص ومهازل طبعا احنا الاتنين مكناش بنذاكر غير ليلة الامتحان وقبل الامتحان باسبوع انا باشتغل على اصحابى فى الدفعات اللى اكبر منى لانى اعرف فيهم ناس كتير كانوا بيدونى ورق حلو اوى، وهى تشتغل على دفعتنا تظبط منها ورق.

وبعد ما ناخد الاجازة اللى غالبا كانت بتبقى اسبوع قبل الامتحان، اخر يوم طبعا فى الجامعة نرجع ننام عشان نصحى بالليل وتبدا المكالمة الصباحى اللى بنظبط فيها هنذاكر ايه الاول، وان كل واحد يبص ع الورق ونبقى ننصح بعض باحسن ورق.

تانى يوم تبدأ رحلة الشقاء صباحا، نصلى الظهر ونتصل ببعض ....... ها هنذاكر من اى ورق كذا وكذا وفلانة نصحت بالجزء دا من الورق الفلانى وفلان بيقول النقطة دى بقى بالذات من ......... وهكذاااااااااااا

ليلة الامتحان مفيش اتصالات نهائى غير بالليل بنتصل نطمن بعض ولو واحدة شمت فينا خبر مهم تتصل بالتانية

وعشان احنا كنا غالبا بنخلص المادة لاول مرة ليلة الامتحان، احيانا كنا بنكمل كلمات وفقرات مش مكتوبة فى الورق الساعة 6 المغرب ليلة الامتحان.

صباح التوتر

يوم الامتحان غالبا كنت بادخل اللجنة بعد الربع ساعة الاولى لانى كنت باقعد تحت اراجع، اما الاستاذة (مضطرة اشرد لها) كانت بتيجى من بيتهم متاخر وتدخل برضو فى التلت ساعة الاولى.

لان امتحانتنا كانت اتنين وخميس، كنا بنروح على طول يوم الاتنين ونطمن على بعض تليفونيا، ونتقابل الخميس نتمشي فى الجامعة وبعدين نقعد على البتاع المربع اللى قدام دار علوم وفيه زرع نسرح احنا الاتنين.

المهم فى يوم من ذات الايام اتصلت بيا استاذتى الحبيبة عشان تقولى مروة "كتب كتابى 12/3 فى مسجد ابى بكر الصديق اللى جمب محطة ام المصريين بعد المغرب" وعاوزة اوصل لكذا وكذا، اسماء طيب ظبطتى الفستان ... لأه، والايشارب ........ لا.

تبقى انتى كدا اسماء صديقة الساعات الاخيرة وصباح التوتر، المهم ربنا يبارك لك يا بنتى والعادة دى بالذات لا ولادى ولا ولادك يورثوها.

من ميل ياهووو

"هيا بنا نحلق في سماء العظماء
"هل فكرت يوماً أن تصبح عظيماً؟"
"احفراسمك في ذاكرة التاريخ"

أخـي الفاضل – أختي الفاضلة
سلام الله عليكم ورحمته وبركاته

اللقاء بكم يتجدد، والشوق إليكم يزداد، عسى الله أن يجمعنا سوياً في جنته ودار قراره
ميعادنا المرة دي مع سؤال صعب شوية ـ ـ ـ

هل فكرت يوماً أن تحلق في سماء العظماء، وأن تكتب اسمك بأحرف من نور في ذاكرة التاريخ؟؟
طيب ممكن نسأل السؤال بطريقة تانية

هل فكرت في يوم من الأيام إيه هي البصمة اللي حتسبها بعد ما تموت؟؟
طيب ما جاش في بالك قبل كده لو انت مكنتش في الدنيا دي كان إيه اللي حصل؟

أسئلة صعبة ـ ـ مش كده؟؟؟
أنا عارف إنها صعبة جداً بل وفي بعض الأحيان مؤلمة لكثير من الناس.
عارفين ـ ـ صعوبة السؤال مش في إجابته
صعوبته جاية من إنه بيخلينا نفتح صفحة كبيرة أويييي لحياتنا – حياة كل واحد فينا
من أول ما اتولد لحد دلوقتي – أياً كان سنه وأياً كان مؤهله، هو لازم يفتح الصفحة دي ويبدأ يبص جواها
إيه اللي عملته ف حياتك خلاّك تحس إنك ذو قيمة في الحياة
إيه اللي أنجزته طوال مسيرة حياتك يخليك تحس إنك عظيم مش أُدام الناس لااا
أُدام نفسك انت عشان تثبت لنفسك أنك تستحق كل النعم التي أنعم الله عليك بها، وعشان تحس إن وجودك في الحياة كان ضروري لإنك فعلاً من القلائل أصحاب البصمات.

طيب، فتحنا صفحة الماضي وكل واحد بص فيها مع نفسه ـ ـ إيه رأيكم نقفلها دلوقتي
ونفتح صفحة جديدة من صفحات حياتنا
صفحة المستقبل، صفحة كلها إشراق وأمل وتفاؤل وتحدي وإنجازات، صفحة لن تكون كأي صفحة من صفحات البشر
نعم، لن تكون كذلك، لأنها ستكون صفحة من صفحات التاريخ العظيم الذي ستكتبه أنت بنفسك
نقدر؟؟ ـ ـ طبعاً نقدر ـ ـ ولازم نقدر إن شاء الله
شوفوا الحكمة الجميلة دي ـ ـ "النجاح قطار يركبه من يصل في الموعدد المحدد"
والحمد لله إن ربنا منّ عليكم في الوقت ده وخلاّكم تركبوا معانا قطار النجاح
فتحنا كلنا صفحة المستقبل ـ ـ شفنا فيها الأمل والإشراق ـ ـ شفنا فيها بصماتنا واضحة ـ ـ شفنا فيها إننا فعلاً نستحق وجودنا في الحياة ـ ـ شفنا فيها إننا فعلاً خير أمة أخرجت للناس
جميل جداً والله الإحساس ده يا جماعة ـ ـ إحساس إنك فخور، إنك وسط أمة كلها عظيمة، أمة كلها من أصحاب القمم العالية
تلك القمم التي تناطح السحاب، قمم عالية فخورة بإسلامها، فخورة بانتمائها لهؤلاء العظماء الذين سجل التاريخ لنا قدرهم ومكانتهم أمثال خالد بن الوليد، صلاح الدين، محمد الفاتح
استشعر معي الآن معنى العظمة وأنت تنتمي لهؤلاء
ولكن ـ ـ أسنظل نفخر بمجد الماضي دون أن نتحرك؟
لا ورب الكعبة، لن يكون هذا حالنا
ولنقرر معاً الآن ونتخذ جميعنا ذلك القرار الجريء
"سنلحق بركب المجد وسنحلق في سماء العظماء"

نعم ـ ـ سيولد من بيننا صلاح الدين مرة أخرى
ويخرج منّا علماء أقوياء يصنعون المجد ويرفعون قدر أمة محمد بين الأمم
نعم ـ ـ سنجد بيننا فتيات أمثال أسماء بنت أبي بكر وأم حرام بنت ملحان
والله يا أخوتي الأحبة لن يعود للإسلام عزة ولن تعود أمتنا إلى عهدها ما لم نقرر جميعاً أن نكون وسط هؤلاء العظماء ووسط هذه النجوم الساطعة
* أخي الفاضل – أختي الفاضلة ـ ـ قرر الآن ـ ـ اتخذ قرارك الآن بشجاعة وإقدام لعل الله ينظر إليك الآن فيباهي بك وسط ملائكته
* قرر الآن أن تحول الحلم إلى حقيقة واقعة وكن على علم بإن الطريق صعب وشاق ويحتاج منك إلى الصبر والجلد
* اعلم أن التفوق والمثابرة لا تعترف بالأنساب والألقاب ومستوى التعليم، بل تعترف بمن عنده همة وثابة، ونفس متطلعة، وصبر جميل لإدراك العلياء
* كن على يقين بأن رحلة الألف ميل تبدأ الآن، بذلك القرار الشجاع ، نعم، هو قرار صعب ولكنه يوضح الفرق ويضع الحد بين المتكلمين والفاعلين
* اعلم أن ميدانه الأول هو نفسك فإن انتصرت عليها كنت على غيرها أقدر وإن خذلتها كنت على غيرها أعجز فجرب معها الكفاح، واعلم أن قدر الرجل على قدر همته
* كن على يقين أنه لا يوجد إنسان ضعيف ولكن يوجد إنسان يجهل مواطن قوته، ولذلك من فضلك الآن ابدأ بنفسك وانظر فيها مواطن القوة واستغلها في سبيل الوصول
* ثق أنه يجب على المرء ألا يحاول أن يكون إنساناً ناجحاً، إنما أن يحاول أن تكون إنساناً له قيمة وبعدها يأتي النجاح تلقائياً
قبل أن أختم إخوتي الأفاضل، أود أن أعلمكم أنه:
"هناك أُناس يسبحون في اتجاه السفينة وهناك أُناس يضيعون وقتهم في انتظارها"
فهل تركب معنا سفينة المجد وتحلق معنا في سماء العظماء أما ستظل تنتظر

ختاماً أقول لكم
" بقدر همتك وجِدُّك ومثابرتك يكتب تاريخك، والمجد لا يُعطى جزافاً، وإنما يؤخذ بالجدارة ويُنال بالتضحية"
(منقول عن)
عبد الرحمن حبت
مدرب تنمية بشرية

واليوم التالي له

1/ 1/ 2007

أول يوم في السنة، كان يوم سعيد جدا في حياتى لأنه يوم خطوبة صديقتي وحبيبتى رحاب ربنا يتمم لها بخير ان شاء الله ، وأشوفها عروسة أمورة وسعيدة في حياتها، وأبقي خالة لأجمل بنت وولد.

رغم ان اليوم السابق له وصلنى خبر وفاة زميل واحدة صاحبتى كان راجع هو واصحابه فى 3 عربيات كلهم اتقلبوا ومات واحد من كل عربية، الحادثة ممكن تكون عادية لكن الكلمة اللى عمري ما بنساها كل ما أجي أنام وهى بتقولى " كنت بحس"دايما ان الولد دا عايش في صراع داخلي بين الدنيا والاخرة .. يمكن لأنه ادا للواحد احساس بنفسه" المشكلة ان الواحد بيرجع تاني وبينسي الجملة دى طول يومه

12/ 1/ 2007

كان عقد هبة صاحبتى وحبيبتى وبنائها ، كان يوم جميل جدا ما شاء الله هو ويوم الحنة ، وفرحت جدا انى قابلت فيه اصحابي بتوع اعدادى اللى بشوفهم كل فين وفين.

رغم انى روحتهالها وأنا في عز النزلة الشعبية اللى رجعت لى تانى ومش راضية تخف، وخلتنى الواحد يقول فعلا ربنا يكون في عون أصحاب الأمراض المزمنة.

3/2/ 2007

من سنة بالظبط ما قابلتش واحدة صاحبتى من ايام الجامعة، علاقتنا ببعض كانت عادية وبعد ما اتخرجنا عزمتنى علي عقدها وروحته ، ومن 3 اسابيع اتصلت بيا وملقتنيش ، كلمتها يوم السبت قالت لي كلمة عمرى ما هنساها

مروة فاكرة لما قولتيلي علي سلم الكلية (واحنا في سنة رابعة) ادعيلي يا يسرا .. ادعيلي في كل صلاة

من ساعتها وأنا بادعيلك في كل صلاة .

الكلمة فعلا كانت صدمة بالنسبة لي وخلتنى أنام وأنا معيطة بالذات انى عارفها وعارفة انها مش بتكدب ولا بتجامل

أحرجتنى جدا لأن ربنا بيكرمنى دايما أوى في حياتى ومش بيخلينى أأقرب غير من ناس فعلا كويسيين (ولا أزكي على الله أحداً) ، وعرفت ليه دايما اللي يعرفوني بيحسدوني علي أصحابي وعلاقتنا ببعض.

وفي استكمال اليوم التالي له

لما ماما ومحمد سافروا يحجوا

ساعتها كنت في تانية كلية ومنار كانت بتشتغل، وكنا لأول مرة هتتحقق لنا أمنيتنا ونقعد مع بعض في الشقة لوحدنا هي صحيح المدة كانت اسبوعين بس برضو هنقعد لوحدنا، كانت طبعا التنبيهات العظيمة انتو بنات وقاعدين لوحدكم عيب لما ترجعوا البيت بعد العشاء، عيب لما تخرجوا وتدخلو كتير يعني اعملوا مشاوريكم كلها مرة واحدة وياريت لو بعد اذنكم متروحوش اى مكان غير الأماكن الأساسية اللى هي الكلية وبالنسبة لمنار الشغل، تروحوا تباتو عند اخواتكم يومين واخواتكم هيجوا يقعدوا معاكم في العيد، لو احتاجتم حاجة اتصلوا بعمو حسين (جارنا اللى تحتنا، ومن أقرب الناس لينا)أو انزلوا خبطوا عليه .. طبعا كان الرد ماشي ياماما سافروا انتو بس واطمنو وربنا يتقبل.

المهم علمت الوصية ونفذت .. بقينا نقول لأصحابنا يزورونا ويفطروا معانا .. سيبنا الشقة كلها ومبقيناش قاعدين غير في أوضة .. يوم تاني رجعنا من عند الخياطة الساعة 11 ونص بالليل .. ماما ومحمد طبعا عشان عارفين اننا هنلتزم بالوصية مكنوش بيتصلوا بينا غير الساعة 11 أو 12 .. روحنا بيتنا عند منال يومين وعند عبير يوم ..وعند خالو يوم .. جت منال قبل العيد بيومين وقلبت الشقة كلها رأساً علي عقب غسيل وتنضيف ربنا يكرمها .. زوج عبير خدنا وخرجنا أنا ومنار في يوم .. طبعا ونظراً لتذنيق ماما علي في خروجي مع أصحابي بتوع الجامعة كانت الفرصة اني اتحرك براحتي أخيراً (الحدق يفهم) .. وكانت أبلة إيمان مواعدنا تيجي تبات معانا بس للاسف معرفتش تتصرف في ابنها لانه كان لسه مولود .. خلصو الأسبوعين وكانوا حلوين إلي حد كبير رغم افتقدنا لماما ومحمد

المهم بعدما عديت الأيام دى واحنا بنحكي عن الأسبوعين كل أصحابنا بتوع المسجد قالولنا يااه لو كنا نعرفكم كنا جينا بيتنا معاكم .. يلا خير الحجة الجاية ان شاء الله

موبايلي العظيم 3310

موبايلي العظيم 3310 يوم الجمعة اللى فاتت وانا قاعدة معاه وباقلب فى الارقام عشان اكلم دعاء منعم عشان اسالها هنخرج امتى .. وأول ما مسكته ومكانش في الشاحن لاقيته عمل charging لوحده بصراحة اتخضيت شوية ، بس لاقيته بعد ما كلمت دعاء وجاية اكلم إيمان عملها تاني .. قولت في نفسي يمكن العاطفة اللى بتربطني بيه وإني كل ما أروح في مكان مبتكلمش عنه غير كويس هو السبب في اللي حصل.

المشكلة إن إيمان كل ما تشوف وشي تتريق عليا وتقولي لازم تغييريه دا لا شكل ولا أي حاجة ، أنا فعلاً فكرت أغير لسبب واحد إنه بيفصل وأنا باكلم المراسلين اللى بيبقوا بيتكلموا دولي، وأحياناً بعد ما بيفصل مبيرداش يفتح تاني غير لما بافتحه وبالعب في السنون اللى جوا، بصراحة مش متخيلة إنى ممكن أستغني عنه وأغيريه، لكن الضغط بدأ عليا من البيت كمان منار بتتريق عليه عشان أغيره، المهم اقترحوا عليا أخليه عندي في الدرج بس غيريه.

بس ربنا صلح حاله دوقتى وبقاله أسبوع تقريبا مش بيفصل وأنا باتكلم .. ربنا ييسر بس احتمال قريب أغيره ... احتمال وليس أكيد.

وما بكم من نعمة فمن الله

النهارده كنت المفروض اقابل اصحابي لكن منفعش اروح لأسباب انهم شدين علينا في الشغل شوية اليومين دول، المهم اصحابي بعتو لى مع اختي جوابات لما قريتها افتكرت الاية دي اوى:

أول واحد من فاطمة كان كارت كانت كاتبة فيه

"حبيبتي ومهجة قلبي ونور عيني القلب الصغير: مروة

والله يا مروة حينما انظر اليك اشعر ببهجة في قلبي ......

حبيبتي انى احبك في الله

واتمني ان نتقرب

فيزداد الحب الذي يجمع

بيننا حتي يصل الي مدا

بعيد حتي يجمعنا الله

زمرا في الجنة علي سرر

متقابلين وفقك الله في حياتك........."

أما دينا

"الي أختي في الله مروة:

أريدك أن تعلو همتك وان تكوني اكثر التزاما فأنا

والله احبك في الله واحبك اكثر وانت ترتدي الايشارب

الطويل صدقيني هذا الكلام لك من قلبي وهذا هو

احساسي الحقيقي تجاهك.

واذا كان صدر منى ما يضايقك فسامحيني

وعفا الله عما سلف"

وكان لـسماح كلام تاني

"حبيبتي/ لولو

اني احبك في الله اتمني ان يجمعنا

الله عنده في الفردوس الاعلي

وان ناتي يوم القيامة من المتحبين في الله

وان يظلنا الله في ظله يوم لا ظل الا ظله

نفسي يا مروة تنظمي حياتك وتضعي اخواتك ضمن الالويات

وان تسألي عليهم دائما وتفتحي قلبك لي ولاخواتك

فإنا جميعاً نحبك جداً يا مروة

بحبك"

اما اكتر حاجة ابكتني رغم انها فرحتني جدا فكانت نهال

"اني احبك في الله ونفسي اقول لك

هذا الكلام: نحن جميعا قلب واحد

وانت قطعة من قلبي

افتقدك عندما لا اراك، ونفسي

جدا تعودي مروة بتاعة زمان كنت

ارى فيك الطيبة والفطرة والحياء

والبساطة، هذه مروة التي عرفتها واحببتها فاكرة (مروة) !!

اثبتي علي الطريق فإن لا هدف لنا الا الجنة

ولا طريق لنا الا هذا ــــــــــــــــ الصراط المستقيم

فلا تكونى هكذا (زجزاج) قال تعالي

ومنهم من يعبد الله علي حرف فإن أصابه خير اطمأن

وإن أصابته فتنة انقلب علي وجهه

خسر الدنيا والاخرة، لا اقصد من ذلك

انك هكذا، ولكن لاني احبك اخاف

عليك واتمني لك الورع

حبيبتك في الله نهال

بالله عليك سامحيني ان صدر مني شئ يغضبك "

لا استطيع أن أرد الا اني بفرح جدا لما بقابلكم كل اسبوع وعمري فعلا ما زعلت ولا هزعل من حد منكم أما نهال فأنا لا أنسي دعائك اللى قولتيهولي قبل كدا

"اللهم حبب إلينا الايمان وزينه في قلوبنا" ... جزاكم الله خيراً علي هذه الكلمات الرقيقة اللى حسستني فعلا "وما بكم من نعمة فمن الله" ازاى الواحد ممكن تكون عنده نعمة ناس بيحبوه وخايفيين عليه بصدق وهو مش حاسس بيها.

ــــــــــــــــــــــــــــــــــــــــــــــــ

* ياريت كل واحد يقرا التدوينة دى يكتب لى الرسالة اللى عاوز ينصحني فيها

12 يناير 2007

12/1 12/1 12/1
يارب يوم مش هنساه لأنه هيبقي يوم فرح هبة وسامح إن شاء الله .. يارب يتمم لها بخير يارب ويسعدها يارب في حياتها وكل المسلمين ... كنت فعلا حاسة انى فرحانة أوي لما بلغتني في التليفون بميعاد الفرح ... هبة دي انسانة فعلا .. ما انساش لما كنت في تالتة ابتدائي وكنا فى الفسحة بنتمشي انا ووفاء صاحبتى فشوفناها اعجبنا بيها اوى وكان نفسنا نصاحبها .. سبحان الله ربنا جمع بينا فى رابعة وخامسة وبقينا اصحاب اوى .. وبعد كدا بقيت انا وهبة في اعدادى وثانوي مع بعض وانقطعت علاقتنا تقريبا بوفاء لانها دخلت مدرسة تانية وعزلت بعيد عن بيتنا احنا الاتنين .. ودخلنا الجامعة مع بعض بس هي كلية علوم وانا إعلام نظراً لاني كنت أدبي بس المهم كنا في جامعة واحدة برضو.


هبة دي انسانة بمعني الكلمة شخصية طيبة اوى جميلة وفطنة في التعامل قليلة الكلام .. عمري ما انسي يوم ما قررت اتحجب وقولتلها ما تيجي نتحجب مع بعض قالت لى يا شيخة احنا لسه صغيريين كنا ساعتها في تانية اعدادى المهم لبسته فى اليوم اللى لبسته فيه عشانى في نفس اليوم.

ولا عمرى هنسي يوم وفاة بابا الله يرحمه ورغم انه كان قبل امتحانات الترم التاني في اولي ثانوي باسبوع بس جت وخدتني وروحنا عندها البيت قعدنا مع بعض لحد بالليل وكانت يوميا بتكلمنى
ولا عمري هنسي طنط ربنا يرحمها لما كانت بتوصلنا للمدرسة وكانوا بيجو يستنوني رغم انى دايما بتاخر وهما مظبوطين في ميعادهم
دا غير ورق الدرس والمجموعة بتاعت الدراسات الاجتماعية ولما اتضايقت عشان دخلت فرنساوى في ثانوى وكان نفسي تدخل الماني معايا ولما هى زعلت مني لما غيرت رايي وقولت هدخل اعلام وهى كان نفسها ادخل السن لانها عارفة انى كنت بحب الالماني وكان نفسها ادرس حاجة انا بحبها.

الغريب اننا رغم كل السنين دى لم نجتمع خلال الدراسة الا 3 مرات رابعة وخامسة ابتدائي وتالتة اعدادى
ربنا يكرمك يارب يا حبيبتى ويسعدك يارب .. وعقبال ما افرح بهبة عبدالوهاب وهبة زين واسماء دياب ورحاب عبد المحسن وايمان عبدالمنعم .

حِـــــــــكــم

(رأيك يهمنا وسجارتك تضرنا)

القائل: مروش ، لياسر تعليب علي الماسينجر رغم إنه مبيشربش سجاير

(الحياة مدرسة)

القائل: جدو الله يرحمه ، نقلها عنه خالو في حوار مع ماما لما زرنا امبارح

(اللهم إنا نعوذ بك من صحبة أهل الفراغ)

القائل: في كتاب الوقت هو الحياة للشيخ يوسف القرضاوي

Wer alles gibt, gibt nie zu wenig.

معناتو ان اللى بيدي كل حاجة أكيد بيدي كتير

القائل : مثل ألماني، نقلها عنه منار اختي

(إذا كان الله ورسوله في جانب فلا تكن في الجانب الآخر)

القائل: بن القيم الجوزية في كتابه القيم جدا جدا الفوائد

اصنعنا على عينك يارب العالمين

القائل خالد أبو شادي في أحد أدعية التراويح

(اهدنا الصراط المستقيم)

أحب آية لي في القرآن، واكتشفت ان رحاب كمان بتحبها

(عاتب أخاك بالاحسان إليه واردد شره بالانعام عليه)

القائل : الامام علي بن أبي طالب، نقلها عنه ايمان عبدالمنعم ع الماسينجر

عيش ندل تموت محروق

القائل : عمر أخو مصعب أحمد - مبرمج موقعنا المبجل

أجمع العارفون بالله أن ذنوب الخلوات هي أصل الانتكاسات وأن عبادات الخفاء هي أعظم أسباب الثبات

القائل : بن القيم الجوزية، رسالة من موبايل منار أختي

(وما بكم من نعمة فمن الله)

القائل: الله عز وجل ، سبحانك يارب ما من شئ رزقتنا اياه من خلق حسن أو ميزة أو نعمة إلا منك

ـــــــــــــــــــــــــــــــــــــ
* من فضلك ضع حكمتك في التعليق

فرحة .. فرحة .. فرحة

نظراً لأني بحب أفرح بأي حاجة بمر بيها في حياتي وبعيش لحظات السعادة بأي حاجة بتحصل لي، رغم إني شخصية قلوقة وبصراحة بدأت أفكر التفكير ده من ساعة ما عملت مشروع التخرج وكان متميز جداً ولله الحمد رغم خلافات الشلة اللى كنا بنشتغل مع بعض وتأثري النفسي بالموضوع ده لدرجة انى فضلت تقريبا لمدة شهر كامل مكتئبة وبعيط .

المهم ساعتها سارة صاحبتى قالت لي عيشي الموقف اللى انتى فيه وسيبك من أي حاجة تكئب لأن الحياة في حاجات كتير تكئب .

بقيت من ساعتها بفرح بأي حاجة أو إنجاز بحققه في حياتي ... بس وأنا بارجع نفسي من فترة وباراجع السنة اللى بعد التخرج لاقيت فى حاجات كتيرة أوي حصلت لمروش لازم تفرح بيها، لاقيت نفسي باتقدم بسرعة في شغلي وكل اللى يقرأ موضوع أنا باعمله يشكر فيه من أول الفكرة لحد الكتابة، واتطور وضعي في الشغل وجت فترة كنت كل ما ادخل فيها بخاف علي نفسي جداً إني أتغر من كتر ما الناس كانت بتشكر في شغلي .

حسيت إن ربنا أنعم عليا في السنة دي بنعم كتيرة أوى أهمها إنه رزقنى بأصدقاء مخلصين جداً خلوني أحب الحياة، وكل ما افتكرهم أعيط وأستغرب إن ازاى ربنا أنعم عليا بأصحاب دي شخصيتهم وبيحبوني الحب دا كله وواثقين ثقة لا نهائية إن ربنا لن يفرقنا آية الله إيمان عبدالمنعم (دا اللقب اللى بقولهولها لأنها ماسكة القسم الدينى في جرنال عين !!) ورفيقة المترو (علي رأي الشخ مسعود) رحاب عبد المحسن، دول البنتين اللى صاحبتهم بعد التخرج وبصراحة حاسة إنهم دعاء من حد ليا في لحظة صدق إني أصحاب ناس كويسيين.

دا غير فرحتي بمحمد أخويا بعد ما خد الدكتوراة، وفرحتي بمنار أختي لما اتخطبت، واستعددنا لاستقبال مولود جديد من عبير، وبرغم إن منال سافرت وخلاص هتستقر مع زوجها ومش هنشوفها هي وسارة وعبدالرحمن ومريم إلا كل فترة طويلة بس يارب يقدرها الخير حيث كان.

ومن ضمن فرحتي برضو فرحتي الكبيرة بحبي لماما وبابا الله يرحمه وأخواتي .. في فترة قعدت أفكر فيهم فلاقيت إزاى الواحد مش ممكن يكون واخد باله من ناس حوليه وقريبين منه بيحبوه الحب دا كله بس لاقيت ان مشكلتنا إننا بنتعامل مع الناس القريبين مننا واللى بيحبونا باعتياد ومبناخدش بالنا من مشاعرهم ناحيتنا رغم انهم أقرب الناس لقلبنا .. فكرت ولاقيت إزاى الواحد ممكن يكون مش واخد باله من مشاعر مرهفة جداً إليه ماما اللى أقل حاجة بتعملها إنها بتقشر لي برتقال على طول وتديهولي اكله عشان ميجليش برد .. بابا الله يرحمه اللى كان بيعملي ساندوتشاتي دايما قبل ما اروح المدرسة وكان بياخدني معاه المسجد ويوصي عليا الشيخ عشان احفظ قرآن ... ومنال ومحمد وعبير ومنار اللي بيعاملوني كأني بنتهم الصغيرة أو زي ما منار بتقولي "احنا بنحس انك حاجة بتاعتنا .. بنخاف عليك وبنفكر فيك وبنحبك أوى"

الحمد لله الذي شكره نعمة تستحق الشكر

كل دى نعم ممكن تكون في حياة الانسان ويتضايق بعد كدا ودا جزء بسيط من اللى في بالى دوقتى لأني أكثر واحده بكسل أفتكر .

وكانت أخر فرحتي النهارده بعد نشر حوار مع شخصية مهمة جداً زي حارث الضاري ..

م الآخر اكتشفت إن أكتر حاجة بتخليني أحس بالفرحة وبالحياة حوليا رسالة أفراح الروح ودي الحاجة اللى بحب أقراها كل ما اكون متضايقة وهتكلم أكتر عنها في تدوينة نظرات في أفراح الروح لأنها أجمل من إني أذكرها بين السطور.

الحمد لله رب العالمين

اللهم صبرنا علي فراق رمضان

امبارح كنت لسه فى الموقع وبعد ما رفعت تقريرين للنشرة وكلت ساندوتش الجبنة الفرنساوي من عند جاد روحت المسجد علشان اصلي تراويح اول يوم رمضان، وكان وقتها بيتردد فى بالي دعاء خالد ابو شادي فى تراويح السنة اللى قبلها بمسجد رواس اغفر لنا ما مضي من ذنوبنا واعصمنا فى ما بقي من عمرنا ، وامبارح ختمت القرآن وراه فى مسجد الحسن ياه مرت ايام رمضان بسرعة ......... ممممممممم .............. الحمد لله بس نفسي أوى أخد بالي بعد رمضان انى أكون أفضل من السنة اللى . فاتت ....

فعلا ما استغلتش رمضان السنة دى كويس رغم انى كنت بحس انى ارادتي فيه اقوى وانى بقيت اعرف اقيم الشئ اللى فى ايديا اكتر من الأول .

واللى بيتردد في بالى دوقتى جزء من مناجاة خالد أبو شادي فى ختام تهجد السنة اللى فاتت برواس برضو:

اللهم ما كان مني ما كان استهانة بحقك ...... ولا جهلا بك .......... ولا انكارا لاطلاعك علي ........... ولا استهانة بوعيدك

وإنما كان من غلبة الهوي ............. وضعف القوي ........ وطمعا في المغفرة ........... واتكالا علي عفوك ............. وحسن ظني فيك .............. وانتظارا لكرمك ............ وطمعا في سعة حلمك ............. وغرني بك الغرور .............. ونفسي الامارة بالسوء ................ وسترك المخفي علي
وأعانني جهلي ................ ولا سبيل لي الا بالاعتصام بك ............. ولا معونة لي الا بتوفيقك .

اللهم تقبل مني رمضان واجعلني فيه من عتقائك من النار واعفر لي سريرتي وتغمدني برحمتك وبارك لي في حياتي واستعملني ولا تستبدلني كلها واغفر لوالدى وارحمهما كما ربياني صغيرا واغفر لإخوتي وبارك في ذريتهم واجمعني بأسرتي في جنان الخلد يارب العالمين.

اللهم ارزقني الصبر علي فراق رمضان وبلغني رمضان اعوما عديدة وازمنة مديدة

عيد ميلادي .. أحداث صنعت تاريخ

يااااه امبارح بقي عندي 22 سنة هو المفروض يوم 12 اكتوبر لان بابا سجلنى قبل ما اتولد عشان ادخل المدرسة بدري ، المهم بقي عندي 22 سنة عند الحكومة

كل سنة وانا طيبة وياب يبارك لي في عمرى ويهدينى فيه للعمل الصالح ويحيينى مادامت الحياة خير لي ويتوفنى مادامت الوفاة خير لي.

والحمد لله اليومين بتوع ميلادي كان فيهم مناسبتين 12 اكتوبر 1992 حصل فيه زلزال في مصر كان جامد اوى فاكرة ساعتها كنت نايمة وجدتي (مامت بابا الله يرحمهما كانت عندنا وصحيتنا كلنا علشان افتكرت ان البيت بيتهد زى ما كل الناس ما افتكروا ونزلنا كلنا الشارع وهي فضلت قاعدة في البيت، وايامها خدنا اجازة من المدرسة وحصل تغيير في مواعيد الدراسة مش فاكراها اوى اصلي كنت ساعتها في تالتة ابتدائي.

وما انساش موقف هو ملوش دعوة بالزلزال بس خاص بعيد ميلادي لما المدرسة بتسالنى انتى عندك كام سنة قولتلها 8 سنيين قالت لى انتى كدابة اللى فى تالتة ابتدائي بيبقي عنده 9 سنييين ومعرفتش اوضح لها ان عيد ميلادى لسه ما جاش فانا عندي 8 سنيين بس اتكسفت اوى ساعتها.

أما اليوم التاني اللى اتولدت فيه فهو 28 سبتمبر واللي حصل فيه الانتفاضة سنة 2000 ، كنت فى تانية ثانوي ومركزة في انى اجيب مجموع كويس خاصة بعد ما حسيت انى زعلت بابا الله يرحمه علشان مجبتش مجموع كويس في الاعدادية ومكنتش بذاكر في اولي ثانوي (السنة اللى توفي فيها)، المهم مكنتش ساعتها متابعة اى اخبار ولا بعرف ايه اللي بيحصل في الدنيا لانى كنت بارجع من المدرسة (اذا روحتها اصلاً) اكل وانام واصحي اروح الدرس وارجع اسهر اذاكر، بس في يوم كان عندي درس فلسفة مش فاكرة يوم الاحد ولا الثلاثاء المهم ملحقتش اتغدي قبل الدرس فاتغديت بعد الدرس كانوا ساعتها مشغليين القناة الاولي علي نشرة 9 فلاقيتهم بيتكلموعلي انتفاضة ومحمد اخويا بيقول مظاهرات ومنار بتحكي علي مظاهرات الجامعة ... فيه ايه يا جماعة اصل حصل كذا كذا في فلسطين ... امتي الكلام ده .. من اسبوع .. انتى مش في الدنيا ولا ايه ، يومها حاولت انام علشان اصحي اذاكر شوية معرفتش انام اصلاً من العياط وتخيلاتي بدأت تشتغل لو حصل وضربو مصر وبقيت لما اسمع اى صوت طيارة بخاف اوى .. بس شوية وعدت الازمة ورجعت اذاكر..

تاني يوم وانا راجعة من المدرسة لاقيت الولاد بتوع المدرسة الاعدادي اللي جمبنا طالعين في مظاهرة وبيقولوا بالروح بالدم نفديك يا فلسطين .

ساعتها قولت ايه التوهان اللى انا فيه دا انا لازم ادخل كلية اكون علي علم فيها باللي بيحصل في الدنيا.

دي اهم الاحداث اللي حصلت في عيد ميلادي ، هو في حدث تاني حصل يوم 28 سبتمبر وهو وفاة جمال عبد الناصر بس علشان انا مش فاكرة للراجل أي خير غير انه عمل السد العالي فمش هتكلم عنه وربنا يحاسبه مكان ماهو قاعد.