١٨ يونيو ٢٠٠٧

س، سؤال

من يومين محمد السيد اسكندرية، وصديق عشرينات الوفى بعت لى تاج، ومن الواضح انى مش هعرف اتهرب منه لانى ساعتها اعتذرت لأنى كنت مشغولة اوى، وجاء وقت الاجابة الان:

س، سؤال: أنت مين؟

ج، جواب: مروة صلاح السيد محمود عجوة- بس عجوة مش مكتوب فى شهادة الميلاد- بكاليورس اعلام قسم صحافة 2005، بشتغل محررة فى موقع عشرينات ومسؤولة عن المراسلين خارج مصر بالموقع.

ليا 5 أخوات أنا أصغرهم منال ومحمد وعبير ومنار، كل واحد فيهم ليه دور مؤثر فى حياتى، أحيانا باقعد أبكى من كتر بما بأحس اد ايه هما بيحبونى (وانتظروا ليهم بوست لوحده).

س، سؤال: مين أكتر 6 شخصيات بتحبيهم فى حياتك؟

ج، جواب:
إذا نحيت أخواتى جانبا لأن ليهم مكانة خاصة يبقى:

- ايمان عبد المنعم .. اتعرفت عليها فى عشرينات.
- رحاب علبد المحسن .. اتعرفت عليها فى اسلام أون لاين، واللى خلانا نقرب من بعض اننا بنروح مع بعض.
- أسماء دياب .. صديقة الكلية وبتشتغل دوقتى فى اذاعة اسلام اون لاين.
- خالتو ايمان .. دى كانت مسؤولتى فى فترة من الفترات.
- طعيمة منصور .. زوج عبير أختى، ربنا يزود المحبة بينهم ويبارك لهم فى أولادهم.
- سارة جمال .. كانت صاحبتى فى الكلية وحاليا من أعز صديقاتى.

بس أنا متضايقة انك حددت لى 6 لأنى بحب ناس كتير أوى، ممكن أمر علي أهمهم مرور الكرام بعد اذنك
نهال ودينا وسماح وأمانى وأسماء وخالتو صفاء وولاء بنت خالى ومريم فتوح ومنى سليم.

س، سؤال: أنت سعيدة؟

ج، جواب: مشكلتى ان سعادتى بتتحكم فيها حاجات معينة، ولو الحاجات دى متحققتش بابقى متعكننة.
ان مفيش حد من اخواتى أو أصحابى يبقى متضايق من حاجة أو عنده مشكلة.
انى مبقاش حاسة بان فى حد متضايق منى أو مش بيحبنى أيا كان، بس للأسف لما الواحد احتك اكتشف ان ناس كتير مش بتقدر ان دا احترام لمشاعرها وبتعتبره سذاجة، فبقى الواحد بيضطر انه يبقى أكثر رخامة أو شدة.

بس بابقى فى منتهى سعادتى لو :
عملت حاجة حلوة أوى فى شغلى، أيا كان صغرها ان شاء الله أكون جيبت فكرة مبتكرة.
لو حد من أخواتى أو أصحابى حصلتلو حاجة تفرح.
لو خرجت مع حد منهم.
لو اشتركت فى عمل تطوعى، أيا كان دورى.
لما باشوف ولاد اخواتى.

وحاجات تانية كتيير مش فاكراها دوقتى، بس عموما لما بابقى زعلانة بافتكر كلمة رحاب ان أقول "الحمد لله" لأن ربنا سبحانه وتعالى بيقول "لئن شكرتم لأزيدنكم"، وبافتكر دايما ان فى ناس قريبين منى حصلهم حاجات فعلا يتقال عليها مصائب.

بس أنا عندى استعداد فطرى انى أفرح، منها يوم ما واحدة صاحبتى جابت لى فانوس رمضان كنت هطير من الفرح.

س، سؤال: لو اتجمعت إنت وحسني مبارك في أوضة واحدة حتقوله إيه ؟

ج، جواب: هو ليه الأذى ده

بس فعلا الأخ الفقيد دا غبى جدا جدا جدا لأبعد حد، وعشان يعالج المشكلة ده هانصحه بأنه يختار حد يقرب منه فيه المواصفات دى: نضيف ودبلوماسي وذكى جدا، بس طبعا الأسلوب هيكون محترم عن كدا كتير لأن ديننا بيأمرنا بأن ننزل الناس منازلهم، وفى الآخر هو من سن جدتى الله يرحمها.

بس فعلا السلطة بتفتن جدا، ربنا يكون فى عونه.

س، سؤال: بتحبى مصر؟

ج، جواب: جدا جدا جدا، بس جالى احساس غريب يوم الجمعة اللى فاتت حست اى باكره البلد دى أوى وأنى لازم أسافر منها بأى شكل من الأشكال لأننا داخلين فعلا على أيام سودة على رأى محمد صبحى.

لكن بعد كدا رجعت وقولت ايه دا يا مروة معقولة دى شخصيتك المواقف اصعبة هى اللى بتكشف الناس، لازم تسعى فعلا ان يبقى ليك دور مؤثر فى المجتمع انتى داخلة على 23 سنة ولسه لحد دوقتى معملتيش حاجة تقدرى تقولى عليها فعلا تنفع مجتمعك، بس لو عاوزة تغير من مجتمعك لازم تشتغلى كويس أوى وتفكرى كتير أوى وتقرأى أكتر وتتكلمى مع ناس فعلا حابين يغيروا من حال البلد.

س، سؤال: بتحبى البنات؟ وليه؟

ج، جواب: بفكر أعتذر أنى أجاوب عليهم، بس ع العموم الاتنين عندى سيان ونفسى لما أخلف ربنا يرزقنى ببنات مع ولاد، زى اخواتى ما يبقاش عندي جنس والتانى لأه.

س، سؤال: ايه أكتر موقف محرج اتعرضتى ليه؟

ج، جواب: كتير جدا جدا لأنى شخصية حساسة أوى وباتحرج من أى حاجة.

س، سؤال: ايه الأمنية اللى بتدعى ربنا انه يحققها لك؟
ج، جواب:
- انه يبقى ليا دور فى المجتمع، ويكون العمل ده خالص لوجه الكريم.
- انه يرزقنى قوة عمر ويقين أبى بكر وحياء عثمان.
- انه يهدينى لما يحبه ويرضاه ويرضينى به.
- انه يتوفانى انا واخواتى وولادهم وأزواجهم وهو راضى عنا.
- انه يغفر لوالدى ويرحمهما كما ربيانى صغيرا.
- انه يكرم صاحباتى اوى اوى ويجمعنى بيهم فى الجنة.


جزاكم الله خيرا يا محمد على الأسئلة الظريفة وربنا يكرمك ويحقق لك ما تتمناه، وابقى قولى النتيجة هتظهر فى الكونترول امتى؟ وممكن ادفع للعامل كام عشان يجبهالى؟

هناك ١٣ تعليقًا:

غير معرف يقول...

somaa 2010
يسعدني أني أكون أول حد يعلق
بجد بحبك يا مروة
بس خالي بالك لحسن
بدل ما نتجمع في الجنة
نتجمع في المعتقل
سلااااااااام

محمد السيد..مش حاسكت يقول...

أخ ..... وأخ وأخ كمان ....

رديتي علي الاسئلة ... ربنا يستر ...

فكرة السعادة اللي اتكلمت عليها .. يمكن كنت لسة باتكلم مع واحد صاحبي عليها امبارح هو عمال يحسب فيها لكن عندي كانت الفكرة بإني أنجزت حاجة كده بقي لنا شهرين عايزين نعملها ومش عارفين "حاجة إنسانية"
لكن هو كان عمال يسأل طيب وليه وإمتي؟والحاجات دي؟؟؟

بعدين عجبني جدا ... إن نفس الردود اللي حأردها لو اتسألت إيه الي بيسعدك ... فشكرا علي الكتابة بدلا مني .

ــــــــــــــ
بتحبي مصر ....

لا تعليق علي كلامك ....
بس لو تقدري متحبيهاش ... متحبيهاش ...
وورينا ياستي .... :D

وعلي كلامك .. متقديش ....

ـــــــــــــــ

الموقف المحرج ... كلام شيرين عليكي بالظبط ... واللي أي حد معدي ممكن يلاحظه عليكي ....

لو مكانك ... علي قد ماأقدر حأحاول متغيرش ..لأن الدنيا والناس بتلغي حاجة زي دي ..

لما نكبر حنفتكر أيام كسوفنا وبرائتنا الأولي ونقول فين لما كنا طيبين وبسطاء وبنحب كل حاجة ...

دي نعمة من ربنا حافظي عليها بجد ...
وياريت متتغيريش ....

ــــــــــــــ

أمنياتك .. يارب .. يارب .. يارب ... يحقق لك كل حاجة فيها .. ويجمعك مع كل حبايبك وصحابك وإخواتك علي خير ..في الدنيا والجنة ...

ودعوة مخصوصة ع الماشي ....

يارب يارب .. مكان ما تروحي ... بعدما تمشي يقولوا .. كانت هنا إنسانة بجد جميلة عملت كذا كذا وأثرت في كذا وكذا ... يارب يفتكروكي دايما بالخير ....

كانت إنسانة طيبة ....

غير معرف يقول...

إجاباتك جميلة يا مروة، وبتبين فعلا قد ايه أنت إنسانة جميلة، ربنا يكرمك ويحققالك كل امنياتك

وشوفى صرفة بقى علشان نتقابل، علشان وحشتينى بقى ولازم أشوفك

غير معرف يقول...

ربنا يارب يامارو يكرمك ويسعدك
بجد ماتعرفيش انا قد ايه فرحت اني اتعرفت عليكي
يسعدك ربنا يارب
:))

Amr يقول...

تاج حلو وإجابات مسلية... صعب أوي الواحد يلاقي حد صحفي كدة... ربنا يبارك لك يا مروة

Alaa يقول...

اجابات جميلة
ربنا يبارك فيكي

mohamed يقول...

بسيطة اجاباتك يا مروه وظريفة ..

ربنا يخليك اخواتك واضح انك بتحبيهم أوي :)

بس استغربت من كلمة مسئولتي مكنتش متوقع يعني

اسباب السعاده عندك بسيطو وانسانية وطبيعيه علي المستوي الشخصي


ربنا يعزك ويرزقك السعادة دايماً

حلم الحرية يقول...

مممممممممممممم

واخيرا جاوبت مروة علي التاج

لولولولولولولي

يا حلولي يا حلولي


اكتر سؤال عجبني هو السؤال بتاع السعادة حقيقي حسيت بالصدق في كل كلمة فيه
وخاصة كلمة انك عندك استعداد فطري للفرح
روحك الجميلة في التعامل بتقول كده

ربنا يديم عليكي السعادة في الدنيا والاخرة ان شاء الله
ويجمعك مع كل الشخصيات الكتييييييييييير اللي بتحبيهم علي خير دايما
ويحققلك امنياتك الجميلة دي كلها

اجاباتك جميلة اوي يا مرمر
محمد شاطر انه بعتلك التاج ده
هاروح اشكره

غير معرف يقول...

السلام عليكم انا اتعملت مع مروة وهى بجد بجد شخصية جميلة وقد اية بتحب الناس ربنا يرزقك يا مروة بكل شىء تتمنية لان بجد من النادر ان الواحد يشوف شخصية زيك فى الزمن دة وربنا الى يعلم قد اية بحبك فى الله بس يا مروة لو روحتى عند حبيبنا الحلوين انتى متعرفنيش طبعا اختك فى الله ايمان زين

وعلى فكرة ردودك جميلة جدا

بجد بجد تحفة

قضية عم أحمد Ahmed Case يقول...

ما شاء الله عجبتني اجاباتك يا مروة .

وبعدين محمد سيد بايع القضية فخلى بالك من تاجاته علشان كلام somaa 2010
ميتحققش :)

تحياتي

محمد السيد..مش حاسكت يقول...

عايز ايه ياعم احمد؟؟؟

ايه بايع القضية دي؟؟

ماشي ياعم .. اشوفك بس ..

ربنا يخليك يا أفندم .... وأشوفك عريس قد الدنيا ...

هبههههووب يقول...

اذيك يا ماروش
انت بجد بنت ذى السكر وحشتينى اوى ووحشتنى ايام الكليه الى عمرها ما هتتعوض
بحبك اوى وربنا يجمعنا تحت ظله يوم لا ظل الا ظله
ربنا يسعدك يارب ويحقق لك كل ما تتمنى
ويخليلك اخواتك يارب
وربنا يسعدك ويرزقك بالزوج الصالح الى يعرف قيمتك ويحبك بجد
يارب يكتب لى اشوفك
سلام مؤقت

Amr يقول...

لفت نظري موضوع النمل أوي، شخصيا مبحبش أقتل نملة لو بشكل منفرد، لكن لو سرب فتبقى إبادة، لكن نملة لوحدها... بابعدها وخلاص