١٩ يوليو ٢٠٠٧

بحب كتير سوا

دى شوية حاجات أساسية بحبها فى حياتى مثلاً:

بحب أركب الميكروباص جمب الشباك وفى الكورسي اللى بيبقى 2

بحب أركب المترو وأسند على الباب أو إذا كانت ماما دعيالى وقعدت أقعد على الكورسي اللى بيبقى فيه مساحة انى اسند عليها راسى وابص من الشباك

بحب كل أنواع الجبن جدا جدا جدا وبحب أحطها على أى أكل، ودا سبب مشاكل كتير بينى وبين ماما لأنها شايفة انى لازم أنوع فى أكلى عشان جسمى يستفيد

بحب اللبن جدا جدا

بحب معظم أنواع السمك

بحب الميه جدااااااااااااااااااااااااااااااااااااااااااااااااااااااااااااااااااااااااااااااااا وفعلا هى حياتى

بحب الهوا، وباتخنق لما الشباك بيبقى مقفول، رغم ان دا الحال عندنا فى الشغل

بحب أتفرج أوى على الأدوات المكتبية ومتعة التسوق عندى أيام الدراسة أنى أدخل المكتبة وأشترى أقلام ملونة وستيكرز وكشاكيل، رغم ان خطى وحش

بحب مسجد العلم والايمان أوى وبحس بأنى إنسانى مختلفة لما بادخلة، لأنى بيفكرنى بمشاعرى أول ما بدأت التزم وازاى روحانيات الواحد كانت عالية أوى

بحب مسجد رواس ود. خالد أبو شادى أوى

بحب أسافر البلد أوى

بحب أى فرصة تجيلى أسرح مع نفسي فيها رغم انى باسرح فى لا شئ بس بحب انفصالى التام عن الدنيا والحياة حوليا .. وللاسف عرفت من كام يوم ان السرحان فى لا شئ بيضعف الذاكرة

بحب النوم أوى

بحب أسمع أغانى أو موسيقى جداً أكتر من انى اتفرج على التلفزيون، وكنت زمان باسمع الراديو كتيييير

بحب كل أنواع الفاكهة جدا

بحب العصاير أوى أوى، وأبرزهم عصير القصب

ولا أنسي أنى أحي مشروبى الحبيب "الشاى بلبن، والكاكاو بلبن"

بحب العمل التطوعى وبحس ان الفترة اللى ببعد فيها عنه غير محسوبة من عمرى أو بمعنى أوضح باعتبر نفسي ميتة

بحب النضارة جدا وزمان وانا صغيرة كنت بتمنى ان نظرى يضعف عشان البس نضارة .. وقد كان

بحب أسهر للفجر مع ولاء بنت خالى

بحب الشقق اللى فيها بلكونة

بحب الناس اللى بتعرف ترسم واللى صوتها حلو واللى بتعرف تعزف موسيقى

كنت بحب سور المبنى بتاع علمى بتاع مدرسة ثانوى لأنه كان عريض أوى وكنت باقعد واربع عليه أنا واصحابى

بحب أسمع الناس اللى بتكلمنى فى حاجات جديدة وانا مش عارفاها لأنى بحس كتير انى طفلة أوى

بحب أقعد أقرا الاتوجرافات بتاعتى، وبحب أوى الجوابات الورق أكتر من الايميلات والرسايل

بحب القراية بس مش عارفة ليه كتب قلية اللى باقراها من الجلدة للجلدة، تقريبا لأنى شخصية كسولة لحد ما

بحب لعب الأطفال جدا، ولبسهم

بحب أكتب اسمى كتير

بحب الايس كريم أوى أوى

وأخيراً وليس بآخر بحب اموت النمل الصغير بصباعى بس نملة أو اتنين ، وبحب لما ألاقى تجمع نمل أحط عليهم مية واتفرج هما بيعملوا ايه
:) :) :)


هناك ٧ تعليقات:

مُصْعَب إِبْرَاهِيم يقول...

واضح إن في حاجات مشتركة كتير أوي .. مش مجال لذكرهم دلوقتي

أنا عندي كام نقطة بس صغيرين :


"حب أسمع أغانى أو موسيقى جداً"

غريبة!! :P


"وأخيراً وليس بآخر بحب اموت النمل الصغير بصباعى بس نملة أو اتنين ، وبحب لما ألاقى تجمع نمل أحط عليهم مية واتفرج هما بيعملوا ايه"

صباح الدموية!!

لا بجد بقى

استمري يا مروة
التفاصيل دي ساعات بتفرق أوي

محمد السيد..مش حاسكت يقول...

لا بقي .. أنا كنت حأعلق وقبل اي حد ... جه امتي ده؟

ماشي ..لولا انه انت ياعم مصعب ... كان بقي ليا تصرف تاني ...........


هااااااااااااااااع .. مين هناك ...


نيجي بقي للكلام الكبير ده ...

أنا باكره الوقفة في المترو بتاعكم ده ....

باحب الحلاوة جدا .. والجبنة مش أوي ....

السمك ...يعني ..ساعات وساعات ....

الميه بقي ... كويس انك جبتي السيرة ... أنا مكنتش ناوي اتكلم بس .... حرام عليكي نفسك .... في فرق بين المية والتلج ...

المية للشرب .... التلج ..مممم مش عارف .. بس هو لأي حاجة تاني ...

اللي بتشربيه ده بقي اسمه تلجججججججج مش مية ... لو مش خايفة علي نفسك خافي علي اللي معاكي .......

...................
كفاية كده أحسن تصدعي ولا حاجة .............

أنا قلت أعلق لما أكون رايق وأديني رقت أهه .....

محمد السيد..مش حاسكت يقول...

لا استني ...
انا لقيتني نسيت حاجت مهمة اوي ....

بتموتي النمل .... إيه الدموية دي .....

تمام تمام .... بس أنا باعمل أكتر حكاية المية دي .....


مش حاطول كفاية .....

بس أطمنك التمثال اللي باعمله لحضرتك قرب يخلص يا أفندم ....

الشكر موصووووووووووووووول والجميل مصان ......
وبجد بجد ... مش لاقي كلام أقوله .....

علي خير دائما وابدا ...

ليكي عندنا ايس كريم يا افندم .... بس حددي بتحبي ايه المرة الجاية :D

غير معرف يقول...

يخرمبشتك يا ماروش

ضحكتينى اوى .. انا يا ختى عن نفسى وانا صغيرة كنت باقعد اعد واتتبع النمل اللى بيمشى بين البلاطة والبلاطة

..

الحاجة التانية يا مروة وهى مشتركة بنا جدا موضوع السرحان فى اللاشىء

لكن هو يا مروة بجد بيضعف الذاكرة .؟؟ خير، عموما عندى شوية حاجات محتاجة انساها

dead man يقول...

طيب ضروري انى اقولك ان دي اول مرة اقرى مروة صلاح من مروة ولمروة

صدقيني اكثر تفاصيل تهمك في الدنيا هي تفاصيلك أنتى

لحظات الجلوس بجوار الشباك والسرحان.. هي لحظات من اشلشجن.. فلا تحترفي الشجن

اكتبي اكثر عنك لتتعرفي عليك

قضية عم أحمد Ahmed Case يقول...

مروة تتكلم عن مروة في ملحمة تاريخية :)

مروة تعبر عن نفسها بشكل جميل ...

أحيك على البوست بالرغم اني علمت عن أخني الكريمة مروة مالم اكن أعلمه ...

بس موضوع قتل النمل ده واقف في زوري ..

انا أعرف واحد كان بيهرب الصرصار بره البيت بدل ما يقتله :))

ويجعلة عامر ....

غير معرف يقول...

وأخرج الإمام أحمد وأبو داود وغيرهما عن ابن عباس رضي الله عنهما أن النبي صلى الله عليه وسلم { نهى عن قتل أربع من الدواب : النملة والنحلة , والهدهد والصرد } إسناده جيد , فهذا نهي وأقل أحوال النهي الكراهة . وظاهر كلام بعض الأصحاب في محظورات الإحرام أن قتل النمل والنحل والضفدع لا يجوز .

وقال ابن عقيل في آخر الفصول : لا يجوز قتل النمل ولا تخريب أجحرهن بما يضرهن.
منقول عن:
http://www.islamweb.net/ver2/Library/BooksCategory.php?idfrom=356&idto=356&bk_no=44&ID=216