١٨ يونيو ٢٠٠٧

س، سؤال

من يومين محمد السيد اسكندرية، وصديق عشرينات الوفى بعت لى تاج، ومن الواضح انى مش هعرف اتهرب منه لانى ساعتها اعتذرت لأنى كنت مشغولة اوى، وجاء وقت الاجابة الان:

س، سؤال: أنت مين؟

ج، جواب: مروة صلاح السيد محمود عجوة- بس عجوة مش مكتوب فى شهادة الميلاد- بكاليورس اعلام قسم صحافة 2005، بشتغل محررة فى موقع عشرينات ومسؤولة عن المراسلين خارج مصر بالموقع.

ليا 5 أخوات أنا أصغرهم منال ومحمد وعبير ومنار، كل واحد فيهم ليه دور مؤثر فى حياتى، أحيانا باقعد أبكى من كتر بما بأحس اد ايه هما بيحبونى (وانتظروا ليهم بوست لوحده).

س، سؤال: مين أكتر 6 شخصيات بتحبيهم فى حياتك؟

ج، جواب:
إذا نحيت أخواتى جانبا لأن ليهم مكانة خاصة يبقى:

- ايمان عبد المنعم .. اتعرفت عليها فى عشرينات.
- رحاب علبد المحسن .. اتعرفت عليها فى اسلام أون لاين، واللى خلانا نقرب من بعض اننا بنروح مع بعض.
- أسماء دياب .. صديقة الكلية وبتشتغل دوقتى فى اذاعة اسلام اون لاين.
- خالتو ايمان .. دى كانت مسؤولتى فى فترة من الفترات.
- طعيمة منصور .. زوج عبير أختى، ربنا يزود المحبة بينهم ويبارك لهم فى أولادهم.
- سارة جمال .. كانت صاحبتى فى الكلية وحاليا من أعز صديقاتى.

بس أنا متضايقة انك حددت لى 6 لأنى بحب ناس كتير أوى، ممكن أمر علي أهمهم مرور الكرام بعد اذنك
نهال ودينا وسماح وأمانى وأسماء وخالتو صفاء وولاء بنت خالى ومريم فتوح ومنى سليم.

س، سؤال: أنت سعيدة؟

ج، جواب: مشكلتى ان سعادتى بتتحكم فيها حاجات معينة، ولو الحاجات دى متحققتش بابقى متعكننة.
ان مفيش حد من اخواتى أو أصحابى يبقى متضايق من حاجة أو عنده مشكلة.
انى مبقاش حاسة بان فى حد متضايق منى أو مش بيحبنى أيا كان، بس للأسف لما الواحد احتك اكتشف ان ناس كتير مش بتقدر ان دا احترام لمشاعرها وبتعتبره سذاجة، فبقى الواحد بيضطر انه يبقى أكثر رخامة أو شدة.

بس بابقى فى منتهى سعادتى لو :
عملت حاجة حلوة أوى فى شغلى، أيا كان صغرها ان شاء الله أكون جيبت فكرة مبتكرة.
لو حد من أخواتى أو أصحابى حصلتلو حاجة تفرح.
لو خرجت مع حد منهم.
لو اشتركت فى عمل تطوعى، أيا كان دورى.
لما باشوف ولاد اخواتى.

وحاجات تانية كتيير مش فاكراها دوقتى، بس عموما لما بابقى زعلانة بافتكر كلمة رحاب ان أقول "الحمد لله" لأن ربنا سبحانه وتعالى بيقول "لئن شكرتم لأزيدنكم"، وبافتكر دايما ان فى ناس قريبين منى حصلهم حاجات فعلا يتقال عليها مصائب.

بس أنا عندى استعداد فطرى انى أفرح، منها يوم ما واحدة صاحبتى جابت لى فانوس رمضان كنت هطير من الفرح.

س، سؤال: لو اتجمعت إنت وحسني مبارك في أوضة واحدة حتقوله إيه ؟

ج، جواب: هو ليه الأذى ده

بس فعلا الأخ الفقيد دا غبى جدا جدا جدا لأبعد حد، وعشان يعالج المشكلة ده هانصحه بأنه يختار حد يقرب منه فيه المواصفات دى: نضيف ودبلوماسي وذكى جدا، بس طبعا الأسلوب هيكون محترم عن كدا كتير لأن ديننا بيأمرنا بأن ننزل الناس منازلهم، وفى الآخر هو من سن جدتى الله يرحمها.

بس فعلا السلطة بتفتن جدا، ربنا يكون فى عونه.

س، سؤال: بتحبى مصر؟

ج، جواب: جدا جدا جدا، بس جالى احساس غريب يوم الجمعة اللى فاتت حست اى باكره البلد دى أوى وأنى لازم أسافر منها بأى شكل من الأشكال لأننا داخلين فعلا على أيام سودة على رأى محمد صبحى.

لكن بعد كدا رجعت وقولت ايه دا يا مروة معقولة دى شخصيتك المواقف اصعبة هى اللى بتكشف الناس، لازم تسعى فعلا ان يبقى ليك دور مؤثر فى المجتمع انتى داخلة على 23 سنة ولسه لحد دوقتى معملتيش حاجة تقدرى تقولى عليها فعلا تنفع مجتمعك، بس لو عاوزة تغير من مجتمعك لازم تشتغلى كويس أوى وتفكرى كتير أوى وتقرأى أكتر وتتكلمى مع ناس فعلا حابين يغيروا من حال البلد.

س، سؤال: بتحبى البنات؟ وليه؟

ج، جواب: بفكر أعتذر أنى أجاوب عليهم، بس ع العموم الاتنين عندى سيان ونفسى لما أخلف ربنا يرزقنى ببنات مع ولاد، زى اخواتى ما يبقاش عندي جنس والتانى لأه.

س، سؤال: ايه أكتر موقف محرج اتعرضتى ليه؟

ج، جواب: كتير جدا جدا لأنى شخصية حساسة أوى وباتحرج من أى حاجة.

س، سؤال: ايه الأمنية اللى بتدعى ربنا انه يحققها لك؟
ج، جواب:
- انه يبقى ليا دور فى المجتمع، ويكون العمل ده خالص لوجه الكريم.
- انه يرزقنى قوة عمر ويقين أبى بكر وحياء عثمان.
- انه يهدينى لما يحبه ويرضاه ويرضينى به.
- انه يتوفانى انا واخواتى وولادهم وأزواجهم وهو راضى عنا.
- انه يغفر لوالدى ويرحمهما كما ربيانى صغيرا.
- انه يكرم صاحباتى اوى اوى ويجمعنى بيهم فى الجنة.


جزاكم الله خيرا يا محمد على الأسئلة الظريفة وربنا يكرمك ويحقق لك ما تتمناه، وابقى قولى النتيجة هتظهر فى الكونترول امتى؟ وممكن ادفع للعامل كام عشان يجبهالى؟