عيد ميلادي .. أحداث صنعت تاريخ

يااااه امبارح بقي عندي 22 سنة هو المفروض يوم 12 اكتوبر لان بابا سجلنى قبل ما اتولد عشان ادخل المدرسة بدري ، المهم بقي عندي 22 سنة عند الحكومة

كل سنة وانا طيبة وياب يبارك لي في عمرى ويهدينى فيه للعمل الصالح ويحيينى مادامت الحياة خير لي ويتوفنى مادامت الوفاة خير لي.

والحمد لله اليومين بتوع ميلادي كان فيهم مناسبتين 12 اكتوبر 1992 حصل فيه زلزال في مصر كان جامد اوى فاكرة ساعتها كنت نايمة وجدتي (مامت بابا الله يرحمهما كانت عندنا وصحيتنا كلنا علشان افتكرت ان البيت بيتهد زى ما كل الناس ما افتكروا ونزلنا كلنا الشارع وهي فضلت قاعدة في البيت، وايامها خدنا اجازة من المدرسة وحصل تغيير في مواعيد الدراسة مش فاكراها اوى اصلي كنت ساعتها في تالتة ابتدائي.

وما انساش موقف هو ملوش دعوة بالزلزال بس خاص بعيد ميلادي لما المدرسة بتسالنى انتى عندك كام سنة قولتلها 8 سنيين قالت لى انتى كدابة اللى فى تالتة ابتدائي بيبقي عنده 9 سنييين ومعرفتش اوضح لها ان عيد ميلادى لسه ما جاش فانا عندي 8 سنيين بس اتكسفت اوى ساعتها.

أما اليوم التاني اللى اتولدت فيه فهو 28 سبتمبر واللي حصل فيه الانتفاضة سنة 2000 ، كنت فى تانية ثانوي ومركزة في انى اجيب مجموع كويس خاصة بعد ما حسيت انى زعلت بابا الله يرحمه علشان مجبتش مجموع كويس في الاعدادية ومكنتش بذاكر في اولي ثانوي (السنة اللى توفي فيها)، المهم مكنتش ساعتها متابعة اى اخبار ولا بعرف ايه اللي بيحصل في الدنيا لانى كنت بارجع من المدرسة (اذا روحتها اصلاً) اكل وانام واصحي اروح الدرس وارجع اسهر اذاكر، بس في يوم كان عندي درس فلسفة مش فاكرة يوم الاحد ولا الثلاثاء المهم ملحقتش اتغدي قبل الدرس فاتغديت بعد الدرس كانوا ساعتها مشغليين القناة الاولي علي نشرة 9 فلاقيتهم بيتكلموعلي انتفاضة ومحمد اخويا بيقول مظاهرات ومنار بتحكي علي مظاهرات الجامعة ... فيه ايه يا جماعة اصل حصل كذا كذا في فلسطين ... امتي الكلام ده .. من اسبوع .. انتى مش في الدنيا ولا ايه ، يومها حاولت انام علشان اصحي اذاكر شوية معرفتش انام اصلاً من العياط وتخيلاتي بدأت تشتغل لو حصل وضربو مصر وبقيت لما اسمع اى صوت طيارة بخاف اوى .. بس شوية وعدت الازمة ورجعت اذاكر..

تاني يوم وانا راجعة من المدرسة لاقيت الولاد بتوع المدرسة الاعدادي اللي جمبنا طالعين في مظاهرة وبيقولوا بالروح بالدم نفديك يا فلسطين .

ساعتها قولت ايه التوهان اللى انا فيه دا انا لازم ادخل كلية اكون علي علم فيها باللي بيحصل في الدنيا.

دي اهم الاحداث اللي حصلت في عيد ميلادي ، هو في حدث تاني حصل يوم 28 سبتمبر وهو وفاة جمال عبد الناصر بس علشان انا مش فاكرة للراجل أي خير غير انه عمل السد العالي فمش هتكلم عنه وربنا يحاسبه مكان ماهو قاعد.