9 نوفمبر، 2007

حصل خير

ياااااااااااااااااااااه أنا بقالى كتير أوى مكتبتش ... دى رحاب اتجوزت بقالها 3 أسابيع ولسه آخر بوست هو بتاع كتب كتابها
يلا حصل خير .. مع انى كل شوية كنت بشوف حاجة وعاوزة اكتب عنها .. بس مش عارفة ليه كنت بكسل كمان حصل أحداث كتير فى حياتى الفترة اللى فاتت تستحق الكتابة عنها .. بس ربنا يبعدنا عن الكسل وحب النوم .. آميين آميييييييييييييييييييييين
لدرجة انى فكرت أقفل البلوج مدمت مش بحدثه وأنضم لمجموعة "فخور بأنى غير مدون" اللى عملها استاذنا على عبد المنعم
بقالى فترة طويلة أوى من قبل رمضان بأسبوع وموضوع الموت ده فى بالى أوى .. وبعد كدا حصل كام حاجة ورا بعض وفاة حد من قرايبنا اللى كنا بنحبهم أوى "عمو رفعت"وتانى يوم على طول اقابل أخت واحدة صاحبتى وأنا رايحة الشغل فاعرف ان زوجها توفى
تالت يوم العيد توصل محمد أخويا الصبح رسالة بأن والدة حد من زمايلنا فى بداية توفت، وأول يوم بعد اجازة العيد تكلمنى سارة صاحبتى من الكلية علشان تقول على أن مامت مريم صاحبتى من الكلية بتحتضر وان اللى بيحبوها يفضل انهم يروحوا يشوفوها دلوقتى .. ودى كانت صدمة قوية أوى لأن الانسانة دى كانت أكتر أم واحدة صاحبتى حبيتها .. ربنا يرحمها يارب كانت فعلا انسانة نقية ومتسامحة لدرجة لا توصف وكل كلام الناس عنها واحنا واقفين فى المستشفى كان بيدور حولين الصفة دى .. وبعدها بكام أسبوع تتوفى جدة منى صاحبتى فى الشغل ........... ربنا يرحمهم يارب ويتجاوز عنهم وعن موتى المسلمين أجمعين
هو الواحد ليه بيخاف من الموت؟
هل لأنو مكسوف من انو يقابل ربنا وهو على هذا الحال
ولا لأنو مرتبط بحاجات كتير فى الحياة حولية أهل وأصحاب وخروج وكلها حاجات فعلا تخلى الواحد يرتبط بيها
ولا طبقا للمثل القائل اللى نعرفوا أحسن من اللى ما نعرفوش
ولا حد ليه رأى تانى؟؟؟؟؟؟؟؟؟
الغريب ان الموت دا جزء من حياتنا اللى هيا مرحلتين الدنيا والآخرة .. بس برضو مش عارفة ليه الواحد ممكن يكون قلقان
يمكن اللى مريحنى فى الموضوع دا حاجة واحدة انى عارفة انى لما أموت رحاب هتدعى لأننا اتفقنا على ان اللى يموت فينا الاول التانى هيستغفر له ويدعيلوا ..دا غير انى ضامنة بإذن الله اخواتى الاربعة وايمان عبد المنعم .. ووصية لأى حد جيت على باله شاف صورة ليا قرالى موضوع دخل على البلوج بتاعى ... يبقى يدعى برضو

هناك 9 تعليقات:

Ahmed Al-Sabbagh يقول...

ربنا يكرمك ويوفقك

ومبروك لرحاب كتب الكتاب

بالنسبة لموضوع الموت بقى

تعملى ايه لو عرفتى ان زميلة مدونة اخرى توفت الاسبوع اللى فات

اه والله

وكانت منطلقة وشخصية جميلة وحبوبة واخلاقها عالية والكل بيحبها هى وزوجها المدون ايضا
خبر الوفاة عندى فى المدونة

ربنا يرحمها ويتولانا برحمتة

بس على فكرة انتى اسلوبك حلو اوى فى الكتابة

انا تقريبا والله اعلم اول مرة اجى هنا

لانى عضو فى رابطة فخور بأنى مدون كسول
هههه

تحياتى
أحمد الصباغ

Salma Amer يقول...

ميرو الجميله
اولا اوعي تبطلي كتابة في يوم الايام ولا تنضمي للأي رابطة
اما بالنسبة لموضوع البوست فانت بتكلمي في موضوع اكيد شاغل بالنا لان دي سنة الحياة حد بيموت وحد بيعيش
بالنسبة ليا الموت بيمثل الفراق عن الناس اللي بنحبهم وده اكتر الم نفسي انا مش بقدر استحملة ومش بيصبرني غير إيماني ان ده قضاء ربنا
بالنسبة لموضوع الخوف من الموت اعتقد ان ده شئ طبيعي فينا وربنا خلق فينا حب الحياة
انت عارفة يا مروة مرة دكتور نفساني قال ان بكاء الشخص على المتوفي في جزء من خوف الشخص نفسه من الموت وانه بيبكي على نفسة
تحياتي ليك واوعي تبطلي تكتبي

مصـ( الخير )ـعب يقول...

حصل خير!

mohamed يقول...

مبروك لرحاب

والبقاء لله في كل من توفى

صحيح بيكون الفراق شئ صعب ولكن فيه كثير من الرحمة
والحمد لله اننا بنحمل ليهم ذكريطيبة ومش ننساهم من دعائنا
ومتتوقفيش عن التديون يا مروة
حتي لو مفيش وقت او في كسل

بس قليل طيب افضل من لا شئ

محمد السيد..مش حاسكت يقول...

خير وخير وخير .. يا أفندم ....

ربنا يزود في خيرك .. وخير الجميع

هبههههووب يقول...

متقفليش المدونه يا ماروش علشان خاطرى
انا بستفيد منها كتير
ولما بلاقيكى بحس انك موجودة ف حياتى
ولما مش بقرأ لك حاجه بحس بسكون
خصوصا انى مش قريبه منك بالنسبه للمسافه
----
ياحبيبتى الموت علينا حق
والدنيا دار ممر لا مقر
والسعادة رحله وليست محطه للوصول
وكل دقيقه فى ناس كتير بتموت وناس بتتولد
انتى بس الى كان فى ناس كتير تعرفيهم توفاهم الله ف وقت واحد علشان كدا الصدمه كانت جامدة
----
بس بصى يا حبى عودى نفسك على انك متتعلقيش بحد لدرجه ان الحياة تقف منغيرة
واعرفى انه ممكن يفارقك ف اى وقت
---
وبالمناسبه دى لو انا رحت لربنا متنسيش تدعيلى كتير
انا عارفه انك قلبك طيب والناس بتحبك والى الناس بتحبه ربنا بيحبه
----

عمر محمود يقول...

عفواً
انا مش داخل اعمل إعلان والله
بس الوقت ضيق
فاضل على عرفة يوم
ناويين على إيه

8 ذى الحجة

هبههههووب يقول...

ايه يا مرووووش فين كتاباتك الجميله اتحفينا يا قمرة
كل عام وانتى والعائله بخير والعيد الجاى اشوفك ف بيتك ان شاء الله
عيد سعيد عليكم كلكم

تسنيم الريدي يقول...

فعلاً يا حبيبتي الموت أقسى ما في الحياة. الله اسال ان يحسن ختامنا