الشوف مش هو النظر الشوف الحقيقي وجهة نظر

على فكرة الجملة دى جميلة وبتعجبنى جداً مش لأنى لابسة نضارة يمكن لأنها بتخلينى أحس بمعاني جميلة؛ وهو إن كل حاجة ليها ماوراء أو ليها بُعد تاني والمفروض الواحد يعود نفسه على إنه يعرف ماوراء الشخص أو الكلام أو....، ويمكن دا الأسلوب الأمثل فى التعامل فى المشهد الأول من المسرحية اللى احنا عايشينها (الدنيا)معلهش الكلام كبر مني والجلالة خدتنى شوية
اللي قال الجملة دي كان محمد صبحي فى مسرحية وجهة نظر، وبحب أكتبها جداً نيك نيم ع الماسينجر
يمكن بقالي شهر ولا شهرين عاوزة اعمل حاجة اكتب فيها مذكراتى لأنى بحس ان حياتى فيها احداث نفسي اسجلها أوى، وأيام مكنت فى الثانوية العامة كنت باكتب الحاجات دي، وبعد كده بقيت اكتب مرتين فى السنة أيام الجامعة عن حياتي في ورق وبقطعه بعد كده لأن خطي وحش أوي ومبحبش أقراه ولا أبص له بصراحة :( المهم وعشان بعد ما اتخرجت اشتغلت فى الصحافة الالكترونية http://www.20at.com/ فكانت الفرصة اللى ممكن استعيد فيها ذكرياتي هي إنى أعمل بلوج.وبصراحة هتلاقونى بتكلم فى البلوج كتير أوى عن نفسي وعن أسرتي لأنى بحبهم أوى وبحس بتقصيري معاهم وأصحابى وممكن أنشر بعض مقالاتي العظيمة بما إني صحفية وبتاع الفول والطعمية والحواوشى ونقابة الصحفيين والأطباء وأنا وانت