عجبنى اوى الاسم ده لما مرفت مراسلتنا فى غزة (ربنا يفرج عن أهلها وأهلنا فى فلسطين وكل بلد يحارب فيها الاسلام) قالتهولى واحنا بنتفق مع بعض ع الماسينجر، مش علشان غيرت الاسم اللى كانت بتقولي بيه يا (حلوة)، لكن عشان قالت لى ان دا دلع مروة بالشامي، وبيني وبينكم انا بحب العرب جدا بالذات دول الشام والمغرب بالنسبة للمغرب العربي، وحتي كان نفسي من زمان يبقي ليا اصحاب عرب وفرحت اوى لما بقيت بتعامل مع مراسلين من دول عربية فى شغلى.
هناك ٦ تعليقات:
ربنا يبارك فيكي يا ماروش..
انتي من الناس اللي بتشتغل بضمير و إخلاص و شغلك حلو..
ربنا يكرمك و إن شاء الله تسافري دول تانية تتعرفي على أصدقاء أكتر..
أنا هأحط لك لينك عندي
زي ما قلتلك علي العنوان القديم هقولك تاني
الف مبروك علي المدونة واوعي تمشي جنب الحيط
ومن الواضح انك هتشتغلي في المدونة بجد واجتهاد زي ما انتى بتعملي في شغلك وده واضح من عدد التدوينات وتواريخها
الى الامام دائما
جزاكم الله خيرا يا جماعة دا بس من ذوقكم، وربنا يكرمكم يا رب.
كنت عاوزة اقول ان النهارده إسراء مراسلتنا فى بغداد قالت لى ان مروة فى العراق بيقولولها يا "مراوى"
مبارك يا مروةعلى البلوج أنا بحبك جدا رغم إن إنتى أحيانا بتضايقنى بس بحس إنك إبنتى الصغيرة و دايما بقولك أنت مدللة و أنا التى ساعدت على تدليلك بس علشان إحنا بنحبك و بنحب نشوفك دايما فى المقدمة إلى الأمام يا مارو فى الشغل وربنا يوفقك بس يا ستى إبقى حطينا فى جدول أعمالك الثمين جداو أوصيك بينا خيرا ولا تنسى من أرضى الله فى سخط الناس رضى عنه الله ورضى عنه الناس و العكس يا بيبى
معلهش التعليق اللى فوق دا بتاعي مش بتاع مروة ، بس عشان احنا اصحاب جهاز واحد لاننا عايشين فى بيت واحد فاضطرت اسرق الجهاز من مروة وهى بعيد عنه -لأنها مابتسبوش طول ماهيه فى البيت -و أباركلها على البلوج
ميرو ..ألف مبروك على البلوج الرائع ده ..انامن زمان وانا مش مرتاحة لهدوئك و طيبتك ..وكل يوم بتثبتيلي انك فعلا واحدة دماغها مش بيبطل تفكير و مش هجاملك لو قلت لك ان اسلوبك رااائع وممتاز جدا ..وكل مااشوفك بأدبك و هدوئك وتواضعك الجميل ده استغرب ازاي الهدوء ده يطلع كل المشاغبات اللي بتكتبها على عشرينات ..بجد بفرح لما اقرأ لك موضوع جديد في نشرة 9 ..بجد اروبة ..اروبة في اختيار العناوين ..وفي المواضيع و في الاسلوب
ولو عليا اعمل للبلوج بتاعك اعلان على كوبري اكتوبر عارفة كده و انتي راجعة م المكتب في الدقي و طالعة على ميدان التحرير كده..تلاقي في وشك هالة سرحان ..و الله لو اقدر احطلك اوت دوور جنبها ولا يغلى عليكي بس زي ما قلتي هنشره على حبل الغسيل بتاعنا ..بس لو سمحتى مش عايزين البلوج بتاعك ينقط على غسيل الجيران علشان علينا ليهم فلوس..و الايجار المتأخر ..انتي مش غريبة يعني
إرسال تعليق