30 ديسمبر، 2006

لما ماما ومحمد سافروا يحجوا

ساعتها كنت في تانية كلية ومنار كانت بتشتغل، وكنا لأول مرة هتتحقق لنا أمنيتنا ونقعد مع بعض في الشقة لوحدنا هي صحيح المدة كانت اسبوعين بس برضو هنقعد لوحدنا، كانت طبعا التنبيهات العظيمة انتو بنات وقاعدين لوحدكم عيب لما ترجعوا البيت بعد العشاء، عيب لما تخرجوا وتدخلو كتير يعني اعملوا مشاوريكم كلها مرة واحدة وياريت لو بعد اذنكم متروحوش اى مكان غير الأماكن الأساسية اللى هي الكلية وبالنسبة لمنار الشغل، تروحوا تباتو عند اخواتكم يومين واخواتكم هيجوا يقعدوا معاكم في العيد، لو احتاجتم حاجة اتصلوا بعمو حسين (جارنا اللى تحتنا، ومن أقرب الناس لينا)أو انزلوا خبطوا عليه .. طبعا كان الرد ماشي ياماما سافروا انتو بس واطمنو وربنا يتقبل.
المهم علمت الوصية ونفذت .. بقينا نقول لأصحابنا يزورونا ويفطروا معانا .. سيبنا الشقة كلها ومبقيناش قاعدين غير في أوضة .. يوم تاني رجعنا من عند الخياطة الساعة 11 ونص بالليل .. ماما ومحمد طبعا عشان عارفين اننا هنلتزم بالوصية مكنوش بيتصلوا بينا غير الساعة 11 أو 12 .. روحنا بيتنا عند منال يومين وعند عبير يوم ..وعند خالو يوم .. جت منال قبل العيد بيومين وقلبت الشقة كلها رأساً علي عقب غسيل وتنضيف ربنا يكرمها .. زوج عبير خدنا وخرجنا أنا ومنار في يوم .. طبعا ونظراً لتذنيق ماما علي في خروجي مع أصحابي بتوع الجامعة كانت الفرصة اني اتحرك براحتي أخيراً (الحدق يفهم) .. وكانت أبلة إيمان مواعدنا تيجي تبات معانا بس للاسف معرفتش تتصرف في ابنها لانه كان لسه مولود .. خلصو الأسبوعين وكانوا حلوين إلي حد كبير رغم افتقدنا لماما ومحمد
المهم بعدما عديت الأيام دى واحنا بنحكي عن الأسبوعين كل أصحابنا بتوع المسجد قالولنا يااه لو كنا نعرفكم كنا جينا بيتنا معاكم .. يلا خير الحجة الجاية ان شاء الله

17 ديسمبر، 2006

موبايلي العظيم 3310

موبايلي العظيم 3310 يوم الجمعة اللى فاتت وانا قاعدة معاه وباقلب فى الارقام عشان اكلم دعاء منعم عشان اسالها هنخرج امتى .. وأول ما مسكته ومكانش في الشاحن لاقيته عمل charging لوحده بصراحة اتخضيت شوية ، بس لاقيته بعد ما كلمت دعاء وجاية اكلم إيمان عملها تاني .. قولت في نفسي يمكن العاطفة اللى بتربطني بيه وإني كل ما أروح في مكان مبتكلمش عنه غير كويس هو السبب في اللي حصل.
المشكلة إن إيمان كل ما تشوف وشي تتريق عليا وتقولي لازم تغييريه دا لا شكل ولا أي حاجة ، أنا فعلاً فكرت أغير لسبب واحد إنه بيفصل وأنا باكلم المراسلين اللى بيبقوا بيتكلموا دولي، وأحياناً بعد ما بيفصل مبيرداش يفتح تاني غير لما بافتحه وبالعب في السنون اللى جوا، بصراحة مش متخيلة إنى ممكن أستغني عنه وأغيريه، لكن الضغط بدأ عليا من البيت كمان منار بتتريق عليه عشان أغيره، المهم اقترحوا عليا أخليه عندي في الدرج بس غيريه.
بس ربنا صلح حاله دوقتى وبقاله أسبوع تقريبا مش بيفصل وأنا باتكلم .. ربنا ييسر بس احتمال قريب أغيره ... احتمال وليس أكيد.

11 ديسمبر، 2006

وما بكم من نعمة فمن الله

النهارده كنت المفروض اقابل اصحابي لكن منفعش اروح لأسباب انهم شدين علينا في الشغل شوية اليومين دول، المهم اصحابي بعتو لى مع اختي جوابات لما قريتها افتكرت الاية دي اوى:
أول واحد من فاطمة كان كارت كانت كاتبة فيه
"حبيبتي ومهجة قلبي ونور عيني القلب الصغير: مروة
والله يا مروة حينما انظر اليك اشعر ببهجة في قلبي ......
حبيبتي انى احبك في الله
واتمني ان نتقرب
فيزداد الحب الذي يجمع
بيننا حتي يصل الي مدا
بعيد حتي يجمعنا الله
زمرا في الجنة علي سرر
متقابلين وفقك الله في حياتك........."
أما دينا
"الي أختي في الله مروة:
أريدك أن تعلو همتك وان تكوني اكثر التزاما فأنا
والله احبك في الله واحبك اكثر وانت ترتدي الايشارب
الطويل صدقيني هذا الكلام لك من قلبي وهذا هو
احساسي الحقيقي تجاهك.
واذا كان صدر منى ما يضايقك فسامحيني
وعفا الله عما سلف"
وكان لـسماح كلام تاني
"حبيبتي/ لولو
اني احبك في الله اتمني ان يجمعنا
الله عنده في الفردوس الاعلي
وان ناتي يوم القيامة من المتحبين في الله
وان يظلنا الله في ظله يوم لا ظل الا ظله
نفسي يا مروة تنظمي حياتك وتضعي اخواتك ضمن الالويات
وان تسألي عليهم دائما وتفتحي قلبك لي ولاخواتك
فإنا جميعاً نحبك جداً يا مروة
بحبك"
اما اكتر حاجة ابكتني رغم انها فرحتني جدا فكانت نهال
"اني احبك في الله ونفسي اقول لك
هذا الكلام: نحن جميعا قلب واحد
وانت قطعة من قلبي
افتقدك عندما لا اراك، ونفسي
جدا تعودي مروة بتاعة زمان كنت
ارى فيك الطيبة والفطرة والحياء
والبساطة، هذه مروة التي عرفتها واحببتها فاكرة (مروة) !!
اثبتي علي الطريق فإن لا هدف لنا الا الجنة
ولا طريق لنا الا هذا ــــــــــــــــ الصراط المستقيم
فلا تكونى هكذا (زجزاج) قال تعالي
ومنهم من يعبد الله علي حرف فإن أصابه خير اطمأن
وإن أصابته فتنة انقلب علي وجهه
خسر الدنيا والاخرة، لا اقصد من ذلك
انك هكذا، ولكن لاني احبك اخاف
عليك واتمني لك الورع
حبيبتك في الله نهال
بالله عليك سامحيني ان صدر مني شئ يغضبك "
لا استطيع أن أرد الا اني بفرح جدا لما بقابلكم كل اسبوع وعمري فعلا ما زعلت ولا هزعل من حد منكم أما نهال فأنا لا أنسي دعائك اللى قولتيهولي قبل كدا
"اللهم حبب إلينا الايمان وزينه في قلوبنا" ... جزاكم الله خيراً علي هذه الكلمات الرقيقة اللى حسستني فعلا "وما بكم من نعمة فمن الله" ازاى الواحد ممكن تكون عنده نعمة ناس بيحبوه وخايفيين عليه بصدق وهو مش حاسس بيها.
ــــــــــــــــــــــــــــــــــــــــــــــــ
* ياريت كل واحد يقرا التدوينة دى يكتب لى الرسالة اللى عاوز ينصحني فيها

4 ديسمبر، 2006

12 يناير 2007

12/1 12/1 12/1
يارب يوم مش هنساه لأنه هيبقي يوم فرح هبة وسامح إن شاء الله .. يارب يتمم لها بخير يارب ويسعدها يارب في حياتها وكل المسلمين ... كنت فعلا حاسة انى فرحانة أوي لما بلغتني في التليفون بميعاد الفرح ... هبة دي انسانة فعلا .. ما انساش لما كنت في تالتة ابتدائي وكنا فى الفسحة بنتمشي انا ووفاء صاحبتى فشوفناها اعجبنا بيها اوى وكان نفسنا نصاحبها .. سبحان الله ربنا جمع بينا فى رابعة وخامسة وبقينا اصحاب اوى .. وبعد كدا بقيت انا وهبة في اعدادى وثانوي مع بعض وانقطعت علاقتنا تقريبا بوفاء لانها دخلت مدرسة تانية وعزلت بعيد عن بيتنا احنا الاتنين .. ودخلنا الجامعة مع بعض بس هي كلية علوم وانا إعلام نظراً لاني كنت أدبي بس المهم كنا في جامعة واحدة برضو.


هبة دي انسانة بمعني الكلمة شخصية طيبة اوى جميلة وفطنة في التعامل قليلة الكلام .. عمري ما انسي يوم ما قررت اتحجب وقولتلها ما تيجي نتحجب مع بعض قالت لى يا شيخة احنا لسه صغيريين كنا ساعتها في تانية اعدادى المهم لبسته فى اليوم اللى لبسته فيه عشانى في نفس اليوم.

ولا عمرى هنسي يوم وفاة بابا الله يرحمه ورغم انه كان قبل امتحانات الترم التاني في اولي ثانوي باسبوع بس جت وخدتني وروحنا عندها البيت قعدنا مع بعض لحد بالليل وكانت يوميا بتكلمنى
ولا عمري هنسي طنط ربنا يرحمها لما كانت بتوصلنا للمدرسة وكانوا بيجو يستنوني رغم انى دايما بتاخر وهما مظبوطين في ميعادهم
دا غير ورق الدرس والمجموعة بتاعت الدراسات الاجتماعية ولما اتضايقت عشان دخلت فرنساوى في ثانوى وكان نفسي تدخل الماني معايا ولما هى زعلت مني لما غيرت رايي وقولت هدخل اعلام وهى كان نفسها ادخل السن لانها عارفة انى كنت بحب الالماني وكان نفسها ادرس حاجة انا بحبها.

الغريب اننا رغم كل السنين دى لم نجتمع خلال الدراسة الا 3 مرات رابعة وخامسة ابتدائي وتالتة اعدادى
ربنا يكرمك يارب يا حبيبتى ويسعدك يارب .. وعقبال ما افرح بهبة عبدالوهاب وهبة زين واسماء دياب ورحاب عبد المحسن وايمان عبدالمنعم .